Home Uncategorized Buscamento di webo den caya grandi tabata exitoso

Buscamento di webo den caya grandi tabata exitoso

SHARE

 ORANJESTAD- Diasabra tabatin un actividad di ‘egghunt’ den caya grandi. Organisador di e evento aki, empresario Lindy Croes a bisa cu e evento a bay bon. “Ta un idea cu den un siman mi a pense y a traha riba dje”. El a pensa riba esaki despues di a ripara cu den caya no a organisa nada pa e clientela di nos centro di ciudad pa e dianan aki. “Mi a pasa cerca e comerciantenan y despues cu e idea aki a bay riba FB, el a crece y bira algo grandi. E reaccionnan tabata hopi y positivo.”

E siman cu ta tras di lomba, ta Semana Santa. Diabierna Santo tur hende ta para keto na sufrimento y morto di Hesus y e dianan cu ta sigui ta celebra su resureccion milagroso. Na varios pais rond mundo e celebracion aki ta encera un fiesta di buscamento di webo. Un tradicion cu Aruba ta parti di dje pa hopi aña caba. Companianan grandi ta participa den e actividad aki, asina tambe caya grandi. Iniciativa cu a bin e aña aki di Lindy Croes, doño di e tienda ‘Lindy Lifestyle Boutique’. 

Lindy: “Nos a cuminsa cu un webo di oro di 100 florin. Di eynan e suma a crece te yega mil florin y tambe nos tabatin dos webo di 500 florin. E acogida tabata enorme. Masha hopi hende ta canando rond den caya en busca di e webonan y na mes momento haciendo compras.” Lindy Croes a bisa cu comerciantenan tabata masha habri pa participa den e actividad di Pasco Grandi aki. “Mi ta contento cu hendenan ta drenta caya, pasobra e lugar ta hopi bunita. Ta e cliente mester bin haci compras y percura pa caya grandi keda bibo. ” Croes a bisa cu tabata hopi trabou, asina mes e ta dispuesto pa haci’e otro aña atrobe, pero e ora e lo kier un team mas grandi pa yude.