Home Uncategorized Amy Richards di partido MEP: “Pakico abo, como hoben, mester vota dia...

Amy Richards di partido MEP: “Pakico abo, como hoben, mester vota dia 22 di September?”

SHARE

Durante e temporada di campaña actual, algo hopi interesante a capta mi atencion. E grupo di young voters y young professionals cu mi ta identifica mi mes cu ne y cu mi a scoge pa representa, ta sumamente disgusta cu e situacion politico actual di Aruba. E disgusto aki a converti den un demotivacion y desapunto total. Esaki a bira un preocupacion pami mirando e cantidad di biaha cu mi ta tende hobennan bisa “Mi voto no lo haci un diferencia” of tambe “Nada no ta bay cambia toch”. Pero, una bes e conversacion continua, mi ta haya tende tur e ideanan cu nan tin den nan curason pa asina por mehora nos isla. Ta tristo cu hopi hoben demotiva ta canando rond cu tremendo vision y solucionnan pa comparti cu nos, como representante, pero lamentablemente nan no ta sinti cu e puntonan aki tin un balor real.

Door di vota bo ta haya un oportunidad pa expresa bo mes

Pa percura pa bo opinion wordo scucha, ta sumamente importante pa vota! Cu bo voto bo por trece cambionan real y positivo pa nos pais. Nos ta biba ariba un isla democratico caminda cu e mayoria di voto ta dicidi. Si mayoria di e hubentud di Aruba no vota, nos lo no sa kico berdaderamente nan ta desea, tampoco nos lo no sa con nan kier mira Aruba den futuro. Na Aruba, cu solamente un voto, e decision final pa un partido por haya un asiento den parlamento por wordo cambia. Rond di mundo tin paisnan cu hendenan mester huy pa motibo cu nan no tin derecho di voto. Tin pais cu ta prohibi hende muher di eherce nan funcion y personanan cu diferente opinion por perde nan bida si nan expresa esaki. Pero nos, cu SI tin libertad di expresion y e derecho di por vota pa un cambio, mester sinti nos mes orguyoso di por participa activamente den e eleccion venidero.

Hoben, si abo no ta contento cu e situacion actual na Aruba, haci algo pa por trece cambio! Haci e esfuerso pa informa bo mes durante e temporada di eleccion aki. Nos no por biba den e erornan di pasado, nos mester tuma e responsabilidad y vota pa un mihor futuro!