Home Uncategorized Parlamentario mr. Juan Ady Thijsen (MEP) : “Den e reunion publico a...

Parlamentario mr. Juan Ady Thijsen (MEP) : “Den e reunion publico a keda comproba cu AVP ta keda wrong and strong riba criminalidad”

SHARE

Diamars a tuma un lugar un reunion publico pidi pa partido MEP pa trata e problema grave di criminalidad na Aruba. Aruba ta worde azota pa criminalidad. Anja a habri cu mas criminalidad cu nunca. Ciudadanonan ta worde ataca riba caya y horta di nan pertinencianan, comercio ta ser atraca of horta. Dia di paga di salario a bira dianan di tension pa no ser atraca.  Hasta den bo hogar bo no ta safe mas. Nan ta drenta cu bo tey of laga di tey. Pio ainda no solamente anochi pero den dia cla tambe. Tur esaki ta motibonan pa haci algo. Aruba tin 7 anja ta wardando riba e plan di Mike Eman pa combati criminalidad. E propio Minister di Husticia Arthur Dowers a haya e puesto di Ministro di Husticia basa riba promesanan hopi alentador. Ainda esakinan a keda como prueba riba youth tube.  Sinembargo desaroyonan den nos pais a indica cu no por sigi mas cu e Minister actual di Husticia y cu gobierno mester busca un otro persona pa ocupa e puesto y e Minister actual mester bai cas. Segun Parlamentario mr. Juan Ady Thijsen den cuadra di esaki den e reunion di diamars oposicion completo a presenta un mocion pa cu esaki.  Esaki no tabata e prome sino e tercer intento pa convence miembronan di parlamento cu nan no mester scohe pa interes partidista pero atrobe e mocion a worde desaproba pa e parlamento mayoritario di AVP.  Partido AVP a pinta atrobe un scenario masha positivo di e trabaonan di Minister Dowers y gobierno di Mike Eman cual tur hende na Aruba segun Parlamentario mr. Juan Ady Thijsen sa cu no ta e realidad. Aruba ta den un crisis di criminalidad.  Segun Parlamentario mr. Juan Ady Thijsen esaki ta un muestra cu AVP no ta biba den realidadnan amargo di nos pais. Nan ta keda wrong and strong segun Parlamentario mr. Juan Ady Thijsen. Pio ainda indicacionan ta cu Dowers cu apoyo di AVP kier bai 4 anja mas. Parlamentario mr. Juan Ady Thijsen ta alerta votadornan pa manda AVP un bon mensahe dia 22 di september venidero cu ta basta cu criminalidad cresciente na Aruba y cu Aruba ta desea un tranquilidad y seguridad. Partido MEP a demostra caba di por percura pa esaki y ta cla pa duna e pueblo loque e merece.