Home Uncategorized Prome Minister Mike Eman: “Rol di Arumil den Formacion Social ta hopi...

Prome Minister Mike Eman: “Rol di Arumil den Formacion Social ta hopi importante paso nan conoce nos cultura”

SHARE

ORANJESTAD – Na final di e bishita cu Minister President a haci diasabra mainta cerca hobennan di SVT riba Seroe Crystal, el a expresa su gratitud na Arumil y Corps Mariniers pa nan aporte valioso na e exito di e programa di Formacion Social. Prome Minister ta reconoce e importancia di disciplina como balor pa un ciudadano, pero particularmente cu ta trata di militarnan Arubiano cu conoce cu cultura y sa con pa compronde miho di unda e hobennan ta bin y con pa anda cu nan. “Si tabata personanan di afo so ta yuda den e guia, por tin cierto aspecto cu nos ta reconoce, cu otro lo no reconoce,” e prome mandatario a expresa na Sergeant Laclé y e Corporaalnan presente mientras tabata yama nan danki.

Gabinete Mike Eman I y II ta hopi contento y gradici pa e sosten ricibi. Actualmente Formacion Social ta realisando su di 10 y di 11 trayecto, y den tur a conta cu Cooperacion di Corps Mariniers, mescos cu di otro instancianan local manera Enseñansa pa Empleo, mescos cu hotel y companianna caminda e hobennan ta realisa e fase di practica prome cu ta gradua.

Sergeant Laclé a splica cu durante e ehercicio aki den mondi, e hobennan ta siña con pa prepara nan cama, paña y cuminda pa nan mes, pero tambe con pa confia riba otro y tene warda. Di e manera aki por aplica e experiencia ey na un trabou den futuro. Ta admiti cu e prome simannan di entrenamento ta esnan mas dificil pa e participantenan pasobra mester kibra e bareranan, reta nan mes y conoce con leu nan por yega.

Personal di Arumil ta motiva nan mas hopi cu por, y pa Sergeant Laclé mes, mescos cu su coleganan, e satisfaccion di mas grandi ta di por bolbe topa cu e hobennan bek na un trabou y cu un bon bida. “No ta paso tur hende a cera porta pa nan, nan no por; nan por haci bon tambe y esey ta mi obhetivo,” Sergeant Lacle a bisa.