Home Uncategorized Presidente di AVB, Ing. Richard Dijkhoff: “CONCACAF y FIFA uzando AVB como...

Presidente di AVB, Ing. Richard Dijkhoff: “CONCACAF y FIFA uzando AVB como ehempel den Caribe”

SHARE

ORANJESTAD, Aruba- E congreso di CONCACAF ta di un interes hopi grandi pa Aruba y tambe pa Arubaanse Voetbal Bond. Ing. Richard Dijkhoff, Presidente di e federacion, a indica cu esaki ta prome biaha cu un congreso di futbol di e magnitud aki ta tuma luga na Aruba. “Naturalmente a honra nos cu bishita di e Presidente di FIFA, cu mi ta bisa ta algo grandi”, Dijkhoff a indica.

Den discurso di Dijkhoff diabierna anochi, el a remarca cu Presidente di FIFA y CONCACAF tempo cu nan tabata campañando, a bishita Aruba. “Tur dos a bisa mi cu dentro di poco nan lo ta na Aruba pero como Presidente. Aworaki esey a sosode tambe y e ta algo historico pa nos”, asina Dijkhoff a remarca. Presidente di Arubaanse Voetbal Bond ta kere cu pa futbol esaki ta algo grandi. E decision no ta pa nan organis’e unda cu ta. Locual cu nan a bisa mi ta cu nan ta organis’e na Aruba, ta cu nan kier duna reconocimento na e federacion pe bon trabou cu nos ta bin ta haciendo ultimamente”.

Presidentenan di CONCACAF y di FIFA a comenta cu tin admiracion pa Aruba y sigur ta considera nos como un lider si tene na cuenta con e organisacion ta traha y pa Dijkhoff esaki ta un reconocimento di tur esfuerso y dedicacion haci, pero mas bien e sacrificionan cu AVB a haci. “E no ta facil. Hopi hende ta bisa bo ta Presidente, pero hopi ora di trabou, bo tin cu convence hende, constantemente bo ta bezig cu futbol, pero pa mi esaki ta duna mi e satisfaccion di tur inversion di sacrificio cu mi a haci cu awe nos tin un CONCACAF na Aruba”, Dijkhoff a remarca.

Durante e recepcion Minister Dr. Alex Schwengle a demostra e ideanan pa cu deporte y esaki a wordo bon acepta. Dijkhoff a sigui remarca cu el a ricibi hopi bon comentario. Ta uza Aruba como un ehempel pe otro paisnan den Caribe con pa organisa futbol, kico mester haci cu futbol y esey ta e reconocimento cu Aruba ta hayando cu e congreso aki di CONCACAF. Ta nota esaki tambe, pasobra e coleganan den region ta acercando Dijkhoff y bisando cu nan tin cu combersa. Nan ta puntrando kico a haci, con bo a haci esey y con Aruba ta asina leu. Esey ta e reconocemento cu ta hayando.

“Nos ta spera cu na Aruba nos por haya esaki, pasobra internacionalmente nan ta reconociendo nos. Por ehempel a nombra mi den directiva di CFU (Caribbean Football Union) , mi ta fourth vice president di e ehecutivonan, mi ta den comision di CONCACAF y den comision di FIFA. Eseynan ta reconocemento cu personalmente mi ta ricibiendo pe bon trabou cu mi ta desplegando”, el a remarca.

E intercambio di informacion entre e 41 paisnan presente a bay hopi bon. E biaha aki esaki a pone un tiki extra presion, pasobra Aruba ta anfitrion di e congreso di CONCACAF. Esaki ta pone cu kier pa tur cos cana na ordo, nechi y elogio so Arubaanse Voetbal Bond a ricibi. E contactonan a bira mas estrecho y Presidente di AVB a tuma nota cu e Presidentenan ta contento y acepta y bisa cu Aruba ta asina bunita y hopi di nan a bisa cu lo regresa. E impacto turistico tambe t’ey y Dijkhoff ta kere cu esey ta e inversion di regreso di e congreso di CONCACAF.

A funda Arubaanse Voetbal Bond na aña 1932 y a afilia na CONCACAF na aña 1986 y despues na FIFA na aña 1988. E ta e organisacion cu ta maneha futbol amateur y profesional riba nos isla, incluyendo e muchanan, hoben, hende muhe y adultonan. E ta responsabel pa sanciona e refereenan y e torneonan di futbol organisa pa mayoria liga. Nan oficina ta situa den Compleho Deportivo Frans Figaroa na Noord.