Home Uncategorized Inscribi pa “Easter Camp” di YMCA prome cu dia 10 di April

Inscribi pa “Easter Camp” di YMCA prome cu dia 10 di April

SHARE

Sherwin Wester, youth worker YMCA Dakota

ORANJESTAD, Aruba : YMCA un biaha mas lo tin nan Easter Camp durante vakantie di Pasco Grandi. E Easter Camp lo tuma luga na den e siman di diamars 18 di April te cu diabierna 21 di April. Sherwin Wester, Youth Worker na YMCA Dakota a indica cu e orario di e camp lo ta di 8:00 AM te cu 4:00 PM na YMCA Dakota y YMCA San Nicolas.

“Durante e camp aki, YMCA lo enfoca hopi riba e parti di actividadnan educativo, deportivo, recreativo y creativo. Tambe banda di esey, nos ta bay enfoca riba Fellowship inclusiveness, desaroyo di vaardigheden y tambe ampliacion di conocemento riba diferente topico”, Wester a remarca. E prijs pa e camp ta AWG. 50,- pa Y’scare members y AWG. 65,- florin pa miembronan di YMCA. Esnan cu no ta miembro di YMCA, por participa na e prijs di AWG. 85,-. E prijs ta inclui tur actividad durante Easter Camp, transportacion pa diferente alocacion durante e camp, tambe cuminda cayente pa merdia y durante dia snack y cos di bebe pe muchanan.

Esaki ta 2 camp den otro, cual 1 camp ta pa kids y 1 camp ta pa teens. E camp di kids ta pa muchanan di 4 te cu 12 aña di edad, mientras cu e camp di teens ta pa muchanan di 13 aña bay ariba. Durante e campnan aki YMCA lo tin supervision di staf di YMCA Dakota y YMCA San Nicolas, pero tambe lo tin boluntarionan cu semper ta yuda pa tin mas bista riba e muchanan.

Pa inscribi por yama libremente na YMCA Dakota na 582-3072 of YMCA San Nicolas na 584-5303. Tambe por pasa libremente cerca nan na YMCA Dakota na Calbasstraat #1 y YMCA San Nicolas na Pastoor Hendrikstraat #55. E luganan pe Easter Camp ta limita y ta pidi pa inscribi prome cu 10 di April.

Young Men’s Christian Association (YMCA) ta funda dia 6 di juni 1844 dor di George Williams na London, Inglatera. Su oficina principal ta na Geneve, na Suisa. Mas di 57 miyon hende ta beneficia di e asociacion estableci den 125 pais rond mundo. E lema principal di e organisacion internacional ta empodera hendenan hoben. Bob Steele a funda YMCA Aruba 60 aña pasa dor di e necesidad pa bin cu un luga pa hobennan pa evita cu nan lo ta riba caya. YMCA tin como meta pa crea personanan util y habil den nos comunidad pa medio di brinda guia y motivacion, pa asina nan ta un influencia positivo ariba nan contemporaneonan.

YMCA ta ofrece diferente actividadnan manera campamento pa mucha, campamento pa hoben, recreacion deportivo manera p.e. volleyball y basketball y otro deporte, como tambe eventonan social. YMCA a cuminsa cu e prome “Tra’i merdia”, yama Y’s Care (YMCA Care) cu a cuminsa na Aruba 25 aña pasa cu un programa di asistencia cu huiswerk y recreo.