Home Uncategorized Corupcion? Favoritismo? Kico ta pasando???

Corupcion? Favoritismo? Kico ta pasando???

SHARE

Un negoshi cu ta existi pa 30 aña, pronto lo mester cera su portanan? No sin prome ta purba cambia su concepto, imagen y protafolio di producto pa scapa un tiki inversion, tur e perdida y empleadonan.

Tres aña pasa e negoshi aki a wordo cumpra pa dos hoben y balente, yiu di tera. Nan a renova e lugar totalmente. A inverti den e lugar mes y bek den e comunidad na radio, revista, servicio social, etc.

Durante 27 aña e negoshi a funciona sin problema. Despues cu ela wordo cumpra pa e dos persona aki, e drama a cuminsa!!!

Ta trata aki di Circle K, habri ainda den orario limita, cambiando su concepto pa MI CUNUCU, ubica na Koningstraat 2: Nos RANCHO. Un area cu autoridad no por controla y pa via di esaki nan ta haya cu ta bon pa cera e negoshi aki.

Dus e conclusionan ta:

– Criminalidad tin mas poder cu autoridad.
– Falta di control y siguridad den e area ta pone comercio sufri.
– E negoshi mester cera, pero e malandronan ta sigui.
– Durante 27 aña e negoshi a funciona sin problema; mester asumi cu esaki ta un persecusion contra doñonan nobo of favoritismo (nos no sa pa ki motibo) pa ex doñonan.

Mirando e trato discriminatorio di autoridad cu e negoshi aki ta hayando y e medidanan cu ta tumando contra su corecto operacion, e negoshi ta bin ta sangra pa mas cu un aña pasobra Polis Eric Ras a stop’e di funciona 24 ora y a pone e lugar cera entre 12am y 6:30am, su shift mas productivo. Den dia, con un minimarket di yiu di tera por competi cu un chines?

Como e negoshi a wordo stroba pa sigui funciona, mas cu 7 persona a perde nan trabou y e debe ta crece cu e proveedornan. No por paga un security mas y pa colmo den menos cu tres siman, a kibra, horta y malogra e negoshi CUATER BIAHA caba. Tur esaki bou di e mirada indiferente di nos Gobierno y su funcionarionan.

Burocracia ta na ordo di dia, e dos empresario aki ta pasando caminda di cruz pa purba salva nan inversion, mientras gastonan di abogado ta skeiro bay.

Asina un ministerio ta keda pasa “e batata cayente” di un pa otro mientras cada cabesante, PERSONALMENTE (cara-cara) ta bisa e dos propietario cu no tin problema pa habri bek 24 ora, ata aki e lista di dirigente:

Prome Minister – Mike Eman: “mi no tin problema”.
Minister di Salud – Alex Schwengle: “mi no tin problema”.
Minister di Economia – Richard Arends: “mi no tin problema”.
Minister di Husticia – Arthur Dowers: “mi no tin problema”.
Alto Comisario di Cuerpo Policial Aruba – Dolfi Richardson: “mi no tin problema”.
Si nan problema ta insiguridad na Rancho, dicon nan no ta actua contra criminal na lugar di pone obstaculo na dos yiu di tera cu ta luchando pa nan negoshi sobrevivi? Dicon durante 27 aña e negoshi no a wordo stroba? Dicon otro negoshinan no tin control y esaki si?

Tatiana Eman-Mallarino