Home Uncategorized Manera MEP a defende e pueblo di Cobalodo nos lo defende e...

Manera MEP a defende e pueblo di Cobalodo nos lo defende e pueblo di Tamarijn

SHARE

Sr Glenbert Croes a enfatisa cu loke cu ta pasando na Tamarijn ta un crimen contra henter Aruba. Gabinete Mike Eman awor tin 8 aña ta cometiendo e crimen aki contra y den tur bario rond di Aruba. Sr. Croes ta elabora:

“Wak kico ultimamente a pasa cu nos Franse Pas unda sin gevoel y consideracion Gobierno a duna DOW ordo pa kap e matanan den Franse Pas te na e extremo cu a destrui e monumento di nos naturalesa cu a elimina e tunnel natural cu tabata tin eynan.

Nos ta compromete nos mes cu nos Digno Pueblo cu na mesun manera cu MEP a defende e pueblo di Cobalodo, MEP lo defende e pueblo di Tamarijn. Den e Gobierno proximo di MEP 22 di september en adelante, MEP lo prohibi tur e dump ilegalnan aki cu lamentablemente ta wordo crea den barionan cu aprobacion di e Ministernan di Gobierno di AVP. Den e caso di Tamarijn tabata un sostenedor y sponser di Minister Benny Zievinger y Gobierno di AVP cu a haya aprobacion pa crea e dump eynan cu consecuencia
grave pa henter e bario.

3 Scol na Paradera a wordo perhudica door cu e huma no ta laga maestronan y nan studiante den un forma “safe” pa nan salud pa por sigui ta na e scolnan aki. Mientras cu awor tin Colegio toets e cosnan aki ta tuma luga sin consideracion pa educacion y futuro di nos muchanan. E cosnan aki ta tumando lugar cu aprobacion di Gobierno di AVP sin consideracion pa cu e bibá di tur famia den nan hogar y den nan bario. E cosnan aki ta tuma lugar cu tur e destruccion y daño cu e ta comete contra nos naturalesa.

Gabinete Mike Eman ta propaga e engaño di mas grandi di ta kere den “green”, no ta den e “green dollars” so nan a kere unda ta beneficio di un grupito so ta wordo privilegia manera den e caso di dump na Tamarijn unda hasta e doño a tribi di cuminsa cobra. Mientras bao di capa di green AVP ta destruyendo e naturalesa di Aruba tur caminda.

MEP lo tene e doño y Gobernantenan personalmente responsabel pa e dañonan cu ta wordo cometi na e famianan den bario, na nan hogar, na scolnan y comercio y na nos Naturalesa cu tanto nos mester cuida y protehe.

E Gobierno nobo di MEP lo prohibi y elimina e actonan aki cu tanto a perhudica nos Pais, nos Pueblo y existencia y herencia di tur e yuinan di nos pueblo pa lanta den un Aruba sigur, limpi, sano y cu future” Ta palabranan di sr. Glenbert Croes.