Home Uncategorized Nagico Insurances awor ta patrocinado principal di Aruba Soccer Academy

Nagico Insurances awor ta patrocinado principal di Aruba Soccer Academy

SHARE

ORANJESTAD, Aruba : No mas cu luna pasa Aruba Soccer Academy a celebra nan prome aniversario y ki miho forma cu anuncia mesora nan aliansa strategico cu Nagico Insurances como nan patrocinado principal. Esaki a sosode recientemente durante un sesion di training na Stadion Guillermo P. Trinidad, memey di un cantidad di futbolistanan hoben.

E academia a cuminsa cu nan trabou dia 1 maart 2016 y mientrastanto a alcansa no menos cu 150 mucha entre 3 pa 15 aña di edad, hunto cu 11 coach certifica cu ta entrena den tres diferente stadion di dialuna pa diabierna. Cada categoria ta train 2 biaha pa siman. ASA su meta ta pa duna e muchanan extra training, banda di e clubnan existente. E clubnan mes ta masha contento cu desaroyo di e muchanan. David “Appie” Abdul cu den pasado tabata hunto pa Sparta Rotterdam tan a cabes di e organisacion y ta e fundado y motor tras di e academia di futbol aki.

Pa Nagico Insurances, ta masha importante duna bek na comunidad, pero ta enfoca hopi riba muchanan y riba deporte. Drs. Detlef Hooyboer, C.E.O. di Nagico Insurances Aruba a bisa di ta impresiona cu e trabou cu ASA ta haciendo pa nos muchanan y no a duda pa saca un man y sostene e proyecto. E ta spera cu di e forma aki por recluta mas futuro futbolista,cu ta crece cu un base solido di training y conocemento di e deporte Rey, esta futbol.

A funda Nagico Insurances na aña 1982 na Sint Maarten y a crece y penetra den mas cu 20 mercado. Nan ta un di e companianan di seguro mas grandi den Caribe Hulandes cu mas di US$ 150 miyon na prima y ta ofrece un di e miho seguro di catastrofe den region. Internacionalmente AM Best a “rate” Nagico como un compania solido. Nagico Insurances a sigui crece adkiriendo British American Insurance Company y awor ta ofrece seguro di bida y medico via e compania Nagico Life.

Aki na Aruba e compania a cuminsa na 2004 y a crece rapidamente, specialmente despues cu na aña 2007 nan tabata e prome y unico compania di seguro cu nan mesun servicio di Road Service. Nagico Insurances tin dos oficina na Aruba, un na Savaneta y otro den Caya Milio Croes na Dakota.