Home Uncategorized Mas di 50 empleado di SVb a participa na “Fitness pa Bida”

Mas di 50 empleado di SVb a participa na “Fitness pa Bida”

SHARE

Plataforma Promocion di Salud ta aplaudi SVb su contribucion na salud di empleadonan

ORANJESTAD, Aruba : Sociale Verzekeringsbank (SVb) cu ta bou di direccion di e dianmico director Ir. Edwin jacobs ta un instancia cu ta haci esfuersonan admirabel pa su empleadonan participa na programanan di nutricion y movecion. E coordinacion di e programanan ta cay bao di e comision “Fitness ta Bida”, estableci na aña 2011. E grupo ta consisti di empleado participando na e programanan a crece di 20 pa 30, te na 53 persona cu actualmente di un forma of otro ta haci ehercicio y come mas saludabel. Como miembro tambe di e Plataforma di Promocion di Salud Minister Schwengle tin hopi aprecio pa e forma con e instituto aki ta motiva su empleadonan pa biba mas saludabel.

Como nan dunado di trabao, SVb no ta obliga su empleadonan pa uni na cualkier programa ni tampoco ta exigi nan di ta parti di un solo programa. SVb ta encurasha y motiva su staf y personal cu informacion y diferente actividad, opcionnan pa gym y haci ehercicio y ta sostene nan cu fondonan pa haci’e mas accesibel pa nan.

Ruben Krozendijk, kende ta traha como controlado den e departamento di control externo, ta un di e coleganan cu ta probechando di e programa na e gym di La Cabana. Contento e ta raporta cu for di dia cu e la cuminsa e programma te cu awor, el a baha ya caba 18 liber. Su condicion y su nutricion a mehora; e ta sinti’e bon. El a splica cu “Comision Fitness ta Bida” a keda estableci den cuadro di un proyecto na aña 2011, cu tabata dirigi riba traha riba e calidad di bida di empleadonan publico. E prome programa a cuminsa na Centro Deportivo Playa y a sigui crece pa inclui tur tipo di deporte, Zumba y hasta tabatin un team di empleado cu a participa na e ultimo Aruba International Half Marathon.

Entre e proyectonan di e comision tambe a conoce un caminata hopi grandi for di Fisherman’s Huts pa Arashi. Krozendijk a remarca cu tambe ta ofrece empleadonan un proyecto di comemento saludabel pa medio di un compania cu ta provee cuminda saludabel pa e empleadonan, y tin un gran parti di su coleganan ta participando. Fuera di e grupo cu ta participa na e trainingnan den gym, cu personal trainer, tin otro coleganan cu ta haci otro deporte, y SVb ta yuda nan tambe.

Invorderaar Shannon Lopez Peña ta un miembro di e comision cu ta lidera e programanan. E ta agrega cu a test diferente programa y semper e comision tin e reto su dilanti pa sigui mehora. E aprecio di e coleganan ta prueba, cu e grupo cu ta sigui crece, y ta activo. E meta ta keda semper “Mantene bo mes saludabel”. Pa loke ta trata gym, Lopez Peña ta splica, tin coleganan ta train na La Cabana, pero tambe tin algun cu ta bay Cuts “n” Curves, My Fitness, otronan cu ta scoge pa Joe Fitness y of un entrenador personal, por ehempel. Tur cos ta depende di cua gym nan ta prefera of ta miho ubica pa nan.

SVb ta sigui pusha cada persona den e ramo cu nan ta gusta y ta siña con pa mehora nan sistema di come tambe. E factor clave ta siña e persona “focus riba bo mes prome”, Lopez Peña ta subraya. El a splica cu e colegialidad tambe ta algo cu ta crece y ta algo cu sigur a keda demostra na momento cu casi 20 colega a lanta for di nan cama 3or di marduga pa bay apoya nan cuater coleganan cu a core e “Half Marathon” pa di dos aña consecutivo.

Cambio ta dificil, pero ta mira cu poco poco e coleganan ta sigui uni na e programanan. Actualmente tin mas cu 50 empleado di SVb ta train na e orario cu ta cumbini cada uno. Tin cu ta train tres biaha pa siman, otronan ta tur dia. Plataforma Promocion di Salud ta desea SVb hopi perseverancia pa yega nan meta di 100% participacion di empleadonan den programanan di “Fitness ta Bida”.