Home Uncategorized Protesta violento na e cuidad di Caracas

Protesta violento na e cuidad di Caracas

SHARE

Caracas, Venezuela – Autoridad di seguridad Venezolano mester a enfrenta e grupo grandi di persona anti-Maduro cu a bay protesta. E manifestantenan a wordo tira cu pepper spray y traangas pa asina purba di caba cu e protesta.

Autoridad a sera diferente area pa asina stroba esnan cu kier protesta contra e gobierno di Maduro. Hobenan a traha baricada, a cende sushi na candela; a tira piedra y boter contra soldaat y polis.

Segun Bernardo Sanchez, un manifestante, un 50 pa 100 homber arma riba brommer a bin y nan a cuminsa tira den aire. Esakinan ta persona pro e gobierno di Maduro. Durante esaki e Sr. Sanchez a wordo tira den pia.

Un miembro di oposicion, Juan Requesens, tambe a keda herida despues cu un persona pro-Maduro a dal e na su cara.

E situacion politico na Venezuela a bira mas tenso ainda pa motibo cu e oposicion den parlamento ta sinti cu nan poder legislativo a wordo kita for di nan. E crisis  politico, economico y social ta mustra di ta keda empeora.