Home Uncategorized Evelyn Wever-Croes: carta na Presidente di Parlamento

Evelyn Wever-Croes: carta na Presidente di Parlamento

SHARE

Señora Presidente di Parlamento,

Siman pasa Aruba a wordo conmovi cu e investigacion penal riba minister Croes cu ta wordo sospecha di ricibi placa bou mesa, pidi placa bou mesa y labamento di placa, acusacionnan hopi grave. Despues di esaki e minister a propone pa e tuma un vacacion cortico, cu pago y kedando cu tur su autoridad, y Conseho di Minister a bai di acuerdo cu esaki.
Sinembargo den comunidad esaki no a wordo acepta. Norma y etica den gobiernacion mundialmente ta pone tambe cu den un caso asina e minister ta tuma su retiro, y asina cu tur duda keda aclarea y e wordo declara inocente, Parlamento por bolbe apunt’e como minister. E proposicion di minister Paul Croes pa keda den function, cu un vacacion cortico, no ta cumpli cu e norma y etica aki, y ta manda un señal equiboca na comunidad. Y mi ta reitera, esaki no tin nada di haber cu e persona di Paul Croes, cu ta un persona simpatico. Esaki tin di haber cu norma y etica. Y mirando cu gobierno di Aruba no ta tene cuenta cu esaki, ta na su lugar pa Parlamento di Aruba tuma accion. Esey ta e motibo di mi carta na bo persona.

Den casonan asina, na mi opinion, dos aspecto ta sumamente importante pa tene na cuenta.

E prome ta e integridad. Un hende di principio ta para pa integridad irespecto di ken ta trata. Un persona no por bisa cu e ta para pa integridad, pero ora ta trata un hende serca di dje, no kier tuma accion. Como Parlamento di Aruba nos mester duna e ehempel y e señal bon cla cu Parlamento ta para pa integridad den gobernacion, irespecto di ken ta trata. Na e momentonan aki nos pueblo ta mira den direccion di Parlamento di Aruba como e unico instancia pa hasi locual ta corecto.

E di dos ta e señal cu ta wordo manda na nos comunidad. Na e momento aki, e señal cu a wordo manda na comunidad ta cu e investigacion di un minister cu ta wordo sospecha di a pidi placa bou mesa, ricibi placa bou mesa y labamento di placa, ta algo ‘normal’, pasobra tur cos ta sigi su curso regular. E señal aki ta equiboca. Serca e cuidadano ta reina e percepcion cu minister Paul Croes ainda ta na mando, y por sigi firma ‘ontheffing’. Tambe ta reina e impresion cu e sospechonan contra e minister lo no ta grave, pasobra tur cos a sigi su curso regular. E impresion aki ta eroneo, y no ta bon pa manda e señal aki.
Señora Presidente, laga nos no lubida cu otro instancianan, entre otro Conseho di Minister di Reino, tambe ta vigilando e desaroyonan aki di serca. Y nan lo no duda den tuma pasonan un biaha mas, y mina nos autonomia mas. Pesey laga nos como Parlamento demostra e madurez cu nos pais mester demostra, cu nos mester por atende nos asuntonan, pa evita cu otronan ta bin atende nan pa nos.

Pa e motibonan menciona akiriba, mi ta di opinion cu Parlamento di Aruba mester trata e topico aki cu e mayor urgencia. Mi ta insisti serca bo persona pa yama e reunion publico cu nos fraccion a pidi dia 31 di maart, mas pronto cu ta posibel, pa asina cosnan por bolbe un poco mas na normalidad, mientras e investigacion ta sigi su curso.

En espera di un respuesta positivo, mi ta termina

Atentamente
Evelyn Wever-Croes
Lider di Fraccion di MEP