Home Uncategorized Durante prome mercado di Santa Rosa den 2017 Minister Sevinger a elogia...

Durante prome mercado di Santa Rosa den 2017 Minister Sevinger a elogia tur esnan cu ta traha pa promove sector primario di Aruba

SHARE

ORANJESTAD – Minister Benny Sevinger a bishita e prome mercado di Santa Rosa di aña 2017. Esaki a tuma luga diadomingo ultimo for di 9’or di mainta pa 2’or di merdia y tabata un exito rotundo. Minister Sevinger durante su bishita a pasa na cada un di e standnan, a combersa cu agricultornan pero tambe esnan cu ta produci remedi di tera, biña y ta bende mata.  El a gradici cada un di nan pa contribui pa halsa e sector primario di Aruba, pa Aruba bira menos dependiente di exterior. E mandatario a probecha pa cumpra diferente producto natural.

“Mi kier gradici tur e participantenan di e mercado aki cu pa añanan largo ta apoya e evento di Santa Rosa. Pero tambe mi mester felicita Santa Rosa cu e evento aki, di tur luna. Ta bisto, mirando e cantidad di bishitantenan, cu nos hendenan ta gusta e tipo di mercado aki.” Tabata momentonan hopi agradabel pa e mandatario, ya cu combersando cu participantenan di e mercado el a siña por ehempel di habonnan traha di aloe of mango y pa kico nan ta sirbi, pero tambe e diferente tipo di remedi di tera cu ta wordo uza pa hopi tempo caba aki na Aruba y pa kico tur nan ta sirbi.

Banda di tur loke tin di sector primario, Minister Sevinger a admira tambe obranan di arte traha di klei y a saborea snack y cumindanan crioyo y organico. Tabata un experiencia mas pa e mandatario. “Mi kier a felicita tur participante pa nan contribucion na comunidad,”e mandatario a bisa y a haci un apelacion pa nan sigui cu e bon trabou.

Despues di su discurso, Minister Sevinger a haci entrega di un plakkaat na Lucio Croes, yiu homber di sra. Bertha Croes (q.e.p.d.), kende a fayece recientemente. E prome mercado di Santa Rosa pa 2017 a wordo dedica na sra. Croes, kende tabata un fiel participante den eventonan di Santa Rosa. Sra. Croes tabata produci remedinan di tera masha conoci na Aruba.

Minister Sevinger tambe a entrega plakkaat na un grupo cu a wordo yama “Amigonan di Santa Rosa”, kendenan e ultimo aña a apoya e mercadonan di Santa Rosa. E evento di diadomingo ultimo a wordo anima door di Tipico Kadushi Largo.