Home Uncategorized HALF MARATHON CU POTENCIAL PA SIGUI CRECE INTERNACIONALMENTE

HALF MARATHON CU POTENCIAL PA SIGUI CRECE INTERNACIONALMENTE

SHARE

A.T.A., KLM, Divi All Inclusive y Barceló Aruba a yama bonbini na periodista, atleta paralympico Shahrzad Kiavash y socionan turistico internacional pa e 32 edicion

ORANJESTAD – Durante e di 32 di edicion di Aruba International Half Marathon Aruba a invita un grupo di Suecia pa tambe forma di e evento. E grupo a consisti di Petra Månström y Lina Skandevall, ambos ta periodista y influencer, Shahrzad Kiavash un atleta cu desabilidad, Paula Boyer, representante di KLM y 7 agencia di biahe.
Cu esfuerzo di A.T.A. conhuntamente cu socionan KLM, Divi All Inclusive y Barceló Aruba a invita e grupo aki riba un biahe pa familiarisa y experiencia nos isla y alaves participa den e half marathon cu a tuma lugar diadomingo 26 di maart. Petra Månström y Lina Skandevall, dos influencer procedente di Suecia, cu tin bon acogida bou di e publico como tambe miles di siguidornan riba rednan social, a wordo invita pa forma parti di e grupo aki. Durante nan bishita riba nos isla, nan tabata comparti nan experencia cu nan siguidornan via Instagram y Facebook. Shahrzad Kiavash cu ta un atleta paralympico cu a participa pa prome biaha aña pasa den weganan Olympico na Brazil y ta preparando su mes pa e proximo weganan olympico, tambe a wordo invita pa A.T.A. y socionan pa tuma parti na nos half marathon. Su persona a gusta e idea di por participa den e half marathon cu alaves a sirbi como parti di su practica pa e próximo olympiada cu lo tuma lugar na Tokyo.

Shahrzah a forma parti di e ekipo “relay” durante e half maraton hunto cu Paula Boyer, representante di KLM na Suecia y Albertino “Betto” Maduro. Paula a core e prome etapa di Joe Laveist pa Seri di Teishi, sigui pa Betto, kende tin descapacidad di visión, pa e di dos etapa di Seri Teishi pa Juliana School. E ultimo etapa di Juliana School pa Alhambra Casino a ser termina pa Shahrzah. Remarkabel ta cu tanto Shahrzad y Betto ta atletanan cu limitacionnan fisico y nan participacion den e half maraton ta sirbi como fuente di inspiracion. Ambos a demonstra cu nan limitacion no ta stroba nan pa logra nan metanan.
Directora di A.T.A., Ronella Tjin Asjoe- Croes, a topa hunto cu Shahrzad pa asina gradicie pa su participacion den nos half marathon y tambe elabora riba su experiencia te awo riba nos isla y alabes papia di con su pasion pa triatlon a cuminsa. Shahrzad ta sumamente impresiona cu Aruba, su bunitesa y hende caluroso. Tambe e la comenta cu Aruba tin hopi pa ofrece riba e tereno di wellness y cu esaki sigur lo ta un tremendo “selling point” pa Aruba, specialmente pa bishitantenan cu ta bishita nos isla pa un temporada largo. Shahrzad su trayecto ta uno impresionante y sigur inspirativo. Surpasando diferente obstaculo den vida, incluyendo saliendo for di su pais natal como un refugiado, a dune un forsa inmenso. Awendia e ta dedica su tempo tambe na duna lectura unda e ta inspira hoben y adulto.

A.T.A. kier gradici tur socio y alabes felicita IBiSA cu un exitoso half marathon unda tabata tin participadornan ambos di Aruba como internacional. Shahrzad y Betto ta demonstra cu e Half Marathon ta accesibel pa un y tur. Aparte di esaki den e periodo di april 29 pa 5 di mei A.T.A. hunto cu Tierra del Sol y Divi Links lo organisa e prome torneo amateur di golf pa un grupo di golfistanan Hulandes hunto cu algún di Aruba cu tin limitacion. Lo spera 20 golfista cu limitacion cu lo jega diasabra 29 di april cu un programa bon hinca den otro caminda aparte di hunga golf nan lo tin oportunidad pa conoce Aruba.