Home Uncategorized Elton Lioe-A-Tjam (ABO): Kudos Ministerio Publico, pero ainda falta!

Elton Lioe-A-Tjam (ABO): Kudos Ministerio Publico, pero ainda falta!

SHARE

Ayera pueblo a cuminsa haya un poco speransa atrobe den Ministerio Publico y nos sistema hudicial. Porfin Ministerio Publico a haya e curashi pa actua contra corupcion den gobernacion, manera ta pasa na tur otro parti di Reino. Nos di partido ABO ta sumamente contento cu e cambio di postura aki. Contento, pasobra corupcion ta un delito contra humanidad, sociedad y futuro generacionnan. Contento, pasobra ladronicia ta algo fout y condenabel. Contento cu Ministerio Publico a cuminsa ‘follow the money trail’ pa haya sa con cierto politico cu a drenta cu 10 florin den nan saco, y cu nunca a traha den sector priva, awendia ta miyonario.

Aki no mester tene cuenta ni tin misericordia cu ningun hende. Pasobra ora esunnan envolvi tabata fiesta, biba lekker, diseña tur sorto di structura fiscal, lanta tur tipo di fundacion y uza tur sorto di ‘stroman y strovrouw’ pa enrikece nan mes riba lomba di pueblo, nan no a tene cuenta ni misericordia cu pueblo. Anto dicon awo pueblo no por ta contento cu porfin algo ta wordo haci pa combati corupcion publico? Danki na personanan asina cu mester duna e bon ehempel, e nomber di Aruba a wordo daña internacional y cu hopi ta kere cu tur Arubiano ta asina. Danki na personanan asina cu mester duna e bon ehempel, e Arubiano no ta wordo respeta mas. Danki na personanan asina cu mester duna e bon ehempel, Aruba ta bancarota, corupcion a bira algo normal y cu Aruba a para bira un sorto di ‘Wild West’ unda tur cos por y tur patrimonio ta wordo bendi of regala. Ley ta papia idioma cla y ley mester wordo aplica igual pa tur hende!

Ban spera cu e euforia di porfin algo ta wordo haci contra corupcion den gobernacion y enrikecimento personal, no lo keda na solamente un ‘verhoor’. Ban spera cu e accion di cuminsa ‘ruim op de boel’, no bira un ‘lollipop’ pa mantene pueblo contento y asina desvia atencion di scandalnan mas grandi y serio. E asunto pa cual Ministerio Publico a ‘verhoor’ un ‘niet zomaar iemand’ ta serio. Pero si nos mir’e den un contexto di suma (pues placa), anto esaki ta ‘peanuts’. Den e proyectonan di ‘Expansion Hospital di casi 1 biyon’, ‘WEB-Hedging di 300 miyon’, ‘E Camindanan Scur di 1.6 biyon’, ‘CITGO-deal di minimal 3 biyon’, ‘Embeyecemento cu Klinkers di mas di 50 miyon’, ‘Negoshi di tereno’ y ‘Conciertonan pa Turismo’, tin hopi mas placa. Consehabel pa Ministerio Publico sigui uza su tactica di ‘Facebook’, pa haya sa kende tin cuentanan bancario na entre otro Colombia, Corsou y Costa Rica. Tambe ta bon pa Ministerio Publico investiga kende tin cas, propiedad y proyecto di ‘Real Estate’ na Colombia, pero cu ta uza un ‘front’ pa tapa ken ta e doño real.

Pueblo tambe kier sa di Ministerio Publico con a para cu e asuntonan di e ex-miembro di parlamento, Sra. Lainda Westerhof y esun unda e minister di Husticia a acusa su ex-colega di turismo pa tur sorto di delito serio y castigabel. E prome ta mas di 4 aña bieu y e ultimo casi 8 siman. E accion aki di Ministerio Publico mester ta uno profundo y no uno di un ‘eendagsvlieg’. Tur esunnan envolvi, sea como ‘front’, ‘stroman of strovrouw’, ‘tramitador di permiso’, ‘Employment Agency’ of ambtenaar, mester wordo investiga. Cu algun hende ta mas sabi of tin ayudo di un notario of hurista creativo pa sconde e ruta di placa bon, esey no kiermen cu tur esfuerso mester wordo haci pa recobra locual a wordo horta di pueblo. Pues pueblo kier mira e ‘Afpakteam’ di Ministerio Publico drenta den accion den tur e asuntonan aki.

Pueblo kier tin e confianza atrobe cu tin husticia imparcial aki na Aruba. Pueblo no kier mas ‘schijnbewegingen’, ‘doofpot’ of conclusionnan manera esunnan di e ‘WODC-rapport’. Pueblo kier mira un ‘Domino-effect’, manera tin diferente declaracionnan y acusacionnan di politiconan unda nan ta admiti cu nan tabata na altura di cierto ‘movecionnan straño y rumornan di coleganan. Delitonan serio a wordo cometi pa añanan largo contra pueblo pa e clase politico, y pueblo a cansa di mira cu semper e clase aki ta sali ilicito di tur investigacion pasobra e ta un clase di ‘niet zomaar iemand’. Hopi hende kier haya e confianza bek den su sistema democratico y hudicial. Esaki ta e chens pa restaura e confianza.

Si realmente tin seriedad pa cuminsa combati corupcion den gobernacion y cu ainda tin hende integro den gobernacion, anto e minister envolvi tin cu tuma su retiro. Y si e minister envolvi no tene e honor na su mes, anto e prome yama pa haci lo corecto ta e minister-president sigui pa parlamento. Ban wak kende lo bay sirbi e interes general y kende lo bay sirbi su propio interes, esun di partido of esun di amigo atrobe. Un señal cla y raspa mester wordo duna cu ainda tin hende drechi y integro aki na Aruba y cu corupcion den gobernacion no ta wordo tolera mas. Ministerio Publico a tuma un paso corecto ayera. Kudos Ministerio Publico, pero ainda falta!