Home Uncategorized Minister Arends den su discurso na inicio di E Business Seminar: “Digitalisacion...

Minister Arends den su discurso na inicio di E Business Seminar: “Digitalisacion ta remodelando nos economia”

SHARE

ORANJESTAD – Diasabra den Renaissance Convention Center tabatin un E-Business Seminar riba entrepreneurship, social media y mobile marketing. Minister di Asuntonan Economico Richard Arends a habri e seminario cu un tremendo discurso. El a enfatisa riba e topiconan di e seminario cu ta entrepreneurship, pero tambe di asuntonan cu no tabata relevante, awendia no por sin nan mas cu ta social media ora di haci negoshi y mercadeo mobil. Den e parti aki Minister Arends ta elabora riba e rol di facilitador di gobierno.

Minister Arends a splica cu desaroyo tecnologico pa futuro ta demasiado importante pa tume como algo facil. Specialmente e “economia di experiencia” cu e consumidornan ta demanda y cu a bira parti di nos bida diario.”

Minister Arends, “E perfil di e turista cu ta bishita nos awendia a cambia, pero mescos tambe e demanda y expectativa di nos propio consumidornan. Pasco cu a pasa un cantidad super grandi di pakete a wordo besteld on line for di Aruba.” Cu esaki Arends kier ilustra con digital network a trece cu ne oportunidadnan na granel. Digitalisacion ta loke ta conta awendia. Brinda WIFI den areanan comercial lo nifica hopi pa e isla aki.

“Mi kier djis ilustra cu banda di retonan, nos tin oportunidadnan: digitalisacion ta re-modelando nos economia. Como minister di Asuntonan Economico y Comunicacion mi kier pone mas atencion na e asunto aki y facilita uzo di tecnologia como un tool pa hiba e economia na un nivel mas halto. Gobierno ta dispuesto pa facilita y tuma un paso mas aleu. Nos lo kier sigui preserva e interes di e entrepreneur.”

“E-commerce ta un potencial cu mester wordo explora ainda na Aruba. No solamente e ta hiba nos ta over di e top economico, pero tambe e ta haci negoshi menos costoso y mas eficiente, ta promove e competitividad di e isla y ta contribui grandemente na e experiencia economico.”

Na final di su discurso Arends a recorda esnan presente cu na cualkier momento di dia mas di 60 mil hende na Aruba ta riba FB, mas cu mita di e poblacion. “Uzo popular di social media den nos negoshi di cada dia lo sigui crece y ta cambia e actitud di e consumidor y brinda demanda pa e ‘experiencia economico’. Mi ta aplaudi y elogia e organisadornan di e evento aki, e panelista, orador y participantenan di conferencianan asina pa haci e-commerce un discusion nacional mas amplio. Eventonan asina ta importante pa trece grupo di hende hunto: hende creativo, entrepreneur, local y expertonan internacional.”

“Hunto nos mester uni forsa pa construi un ‘Economia basa riba conocimento’ cual lo ta e diversificacion di e economia cu nos ta haci tur esfuerso pa tin.”