Home Uncategorized Grupo 11 di Formacion Social a drenta Marinierskazerne

Grupo 11 di Formacion Social a drenta Marinierskazerne

SHARE

ORANJESTAD – Dialuna mainta tempran, hobennan cu a inscribi nan mes pa haya un chens di forma parti di Sociale Vormingsplicht (SVT) of Formacion Social, a presenta na porta di Marinierskazerne na Savaneta. E 15 hobennan a pasa den un trayecto di seleccion riguroso y a pasa testnan necesario prome cu a yega asina leu. Nan grupo ta e di 11 grupo di e programa cu a cuminsa 5 aña pasa como un cooperacion entre Ministerio di Asuntonan General y Ministerio di Defensa di Reino Hulandes. E motor tras di e programa aki tabata Prome Minister Mike Eman cu semper a considera e programa aki uno importante y tambe cu a demostra su efectividad, yudando hobennan cu no a logra finalisa scol, un miho perspectiva pa nan futuro.

Grupo 11 a wordo ricibi pa e team di maneho di Formacion Social encabesa pa Lurene Flanegien, kende ta sostene programa di Formacion Social como un trahado social. E hobennan na nan yegada a haya splicacion extenso di tur e responsabilidadnan cu nan tin nan dilanti. Un parti importante di e programa ta cu un bes e hobennan drenta  Marinieskazerne, nan lo no tin contacto cu ningun famia y amistad pa 3 siman largo. Esaki ta e fase inicial di e trayecto y ta esun mas intensivo di e henter e programa.

Meta primordial di e proyecto ta pa yuda hobennan cu no ta bayendo scol y cu no ta traha pa haya un formacion p’asina nan por logra mehora nan perspectiva pa futuro y evita cu nan por bay den direccion robes. E formacion ta consisti di cuatro luna di preparacion den Marinierskazerne bou guia di un team dedica di ARUMIL. Aki nan ta cera conoci cu tur faceta di disciplina manera lanta tempran, yega na ora, determinacion, ehercicio fisico y traha den team. E otro ocho lunanan ta dedica na atende diferente cursonan di Enseñansa pa Empleo y un parti practico, stage, na un empresa.

Dialuna mainta ta un dia trankil pa e participantenan, segun sra. Flanegien. E ta un dia pa nan cera conoci cu otro, pas nan uniform y ricibi tur e materialnan cu nan ta bay uza den e simannan nan dilanti