Home Uncategorized EVELYN WEVER-CROES: SI DI BERDAD ABO KIER PROTEHA NOS NATURALESA

EVELYN WEVER-CROES: SI DI BERDAD ABO KIER PROTEHA NOS NATURALESA

SHARE

BAN HUNTO P’E CAMBIO, SIN MIEDO

STA. CRUZ — Lider di MEP Evelyn Wever-Croes den conferencia di prensa semanal di su partido a trese padilanti kiko e kiermen cu e slogan “Ban hunto p’e cambio” y a pone esaki den contexto di proteccion di nos naturalesa.
“Pa por protehe nos naturalesa di berdad, nos mester bin cu e ley di medio ambiente. Sin e ley, e destruccion ta sigi, y ningun hende ta carga responsabilidad. Cu e ley di medio ambiente, tur hende sa kiko por y kiko no por. Y tur hende sa kiko ta e consequencianan y e castigonan na momento cu bo viola e ley. Ta asina so bo por logra proteccion di nos naturalesa.
Ademas nos mester di gobernantenan cu ta bisa loke nan ta hasi y ta hasi loke nan ta bisa. No gobernantenan cu ta pretende cu nan tin naturalesa na pecho, pero den practica ta destrui naturalesa constantemente.
GOBIERNO DI AVP A DESTRUI NATURALESA
Pasobra si bo mira bon, gobierno di AVP a hipoteca nos pais cu storianan “berde” y di proteccion di nos medio ambiente. Pero kiko nan a hasi REALMENTE? Destrui gran parti di nos naturalesa. Mangrovenan, Bubali Plas, beachnan. Urirama, Spaans lagoen y awor tambe Rooi Frances. E gobierno aki no a hasi nada pa protehe nos naturalesa, es mas, e gobierno aki a permiti nan desaroyadornan destrui naturalesa valioso na Spaans lagoen, Pos Chikito, Bubali Plas, Rooi Frances y por poco tambe na Urirama. Pesey e gobierno aki bo no por confia cu nan lo hasi algo pa protehe nos naturalesa. Si den 7 anja nan no a hasi’e, den e 7 lunanan cu ta resta sigur nan lo no hasi’e
.
BISHITA DI PRINSES BEATRIX
E siman aki cu Prinses Beatrix ta di bishita na Aruba riba invitacion di Parke Arikok. Durante su bishita lo traspasa Spaans Lagoen pa Parke Arikok, pa asina purba evita cu mas daño lo wordo hasi na e area bunita di Spaans Lagoen. Hustamente e siman di e bishita real, Aruba ta habri cu un tristesa grandi pa e destruccion di Rooi Frances. Algo cu a afecta henter nos comunidad. Y no tin ningun logica, ni hustificacion. Y un simple disculpa no ta suficiente. Pesey nos mester di un cambio real.

Si di berdad abo kier proteha nos naturalesa, uni bo mes na e cambio. Hunto nos ta ban p’e cambio, y sin miedo” segun lider di MEP Evelyn Wever-Croes