Home Uncategorized Xena Profet di Ministerio di Turismo, Transporte, Energia y Ambiente: “Aruba ta...

Xena Profet di Ministerio di Turismo, Transporte, Energia y Ambiente: “Aruba ta conociendo interes di turistanan Europeo”

SHARE

ORANJESTAD – Prome Minister, banda di ta na Hulanda pa celebracion di dia nacional di Aruba, tabata tin un agenda sumamente druk e siman cu a pasa. Asina a reuni cu instancianan gubernamental, gobernante, politiconan, pero tambe partnernan importante pa Aruba, particularmente partnernan economico. KLM sigur ta un di esakinan, pero tambe ATA-Europe cu tin un trabou sumamente importante pa mercadia Aruba den e continente Europeo. Xena Profet ta conshero di Ministerio di Turismo, Transporte, Energia y Ambiente y a asesora Prome Minster den tur e reunionnan relata na turismo.

Den reunion cu oficina di Aruba Tourism Authority na Europa, a atende puntonan di interes manera e promocion di Aruba como destino den mercado Europeo y e tendencia di biaheronan. Como conclusion por bisa cu mas y mas mercado ta habriendo na e continente pa Aruba, directamente of den combinacion cu otro destinacion.

Profet a duna di conoce cu, durante e reunion cu ATA Europa, a haya un bista mas di e cifranan di airlifit y con importante e mercado Europeo ta pa Aruba. A papia cu ya Hulanda ta e fuente di bishitante principal, pero tambe ta ricibiendo turistanan di Scandinavia y Italia. E ultimo aki a conoce un aumento resaltante, caminda hopi Italiano ta scoge nos isla como nan destino pa honeymoon.

Loke tambe ta hala atencion di e tendencianan aki, ta cu bishitantenan Europeo ta busca pa hinca Aruba den combinacion cu otro destino den e hemisferio aki. Por ehempel, ta planea un City Trip pa New York y hunto cu esey, ta traha un Island Trip pa Aruba. Cu e informacion aki, ta keda awo na Aruba Tourism Authority pa hunto cu su partnernan den e industria, crea mas oportunidad di paketenan caminda por yega Aruba facilmente for di otro paisnan den Norteamerica.

Un strategia cu ATA ta aplicando caba ta pa traha cu asina yama ‘influencers’ cu ta personanan cu tin hopi ‘followers’ of siguido riba social media. Ta invita nan pa bin Aruba y asina ta yega directamente na un mercado hopi grandi. Un ehempel di esaki ta e bishita cu e canta-autor Hulandes Marco Borsato a haci na februari ultimo durante Carnaval. “Esaki tabatin un ‘PR value’ masha grandi y asina ta purbando pa hendenan tin otro bista di Aruba, pa medio di hendenan famoso cu ta gosa di nos isla,” Profet a splica.

Tambe a señala cu e mercado di Europa ta bira mas importante, awo cu ta wak con e bishitanan for di Venezuela a bira menos. Aruba tin bentahanan importante manera un bon conexion danki na e seis buelo pa siman cu KLM ta haci entre Schiphol y Aeropuerto Reina Beatrix. For di eynan ta facil pa conecta cu cualkier otro airport na Europa. D’jey ta bin acerca esnan cu ta prefera di yega Aruba via Merca, pais cu cual tambe tin hopi bon conexion y e facilidad di “Pre Clearance ta haci’e hopi facil pa turistanan bin Aruba y bay Merca bek sin ningun problema,” asina e consehero a finalisa bisando.