Home Uncategorized President director di KLM Pieter Elbers satisfecho cu cifranan positivo di Aruba

President director di KLM Pieter Elbers satisfecho cu cifranan positivo di Aruba

SHARE

ORANJESTAD/AMSTERDAM – KLM ta un partner importante pa Aruba. Motibo pakico Prome Minister Eman a reuni cu President director di KLM Pieter Elbers. E reunion aki a wordo teni den e oficina principal di KLM na Amsterdam. Despues di e encuentro aki, Elbers a bisa cu el a experiencia e reunion como uno positivo y constructivo. “Mi ta contento cu Premier Eman a base regular ta bishita nos.”

Elbers: “Nos a tira un bista patras y a wak dilanti. Tambe nos a papia di e desaroyonan na Aruba den relacion cu KLM. Mi ta haya cu KLM ta bayendo hopi bon na Aruba. Desde algun aña nos ta bek na Aruba y nos ta mira un crecemento stabiel y perspectivanan hopi positivo pa Aruba.” President director di KLM ta bisa cu esaki ta debi na e hecho cu Aruba ta un isla fantastico, pero e ta di opinion tambe cu e stabilidad riba e isla sin duda ta yuda enormemente. “E inversionnan cu ta wordo haci ta yuda tambe pa e pasaheronan mira con bunita Aruba ta.”

KLM ta sigui inverti den su producto pa por garantisa cu pasaheronan ta sigui bula cu e compania pa Aruba. “Nos ta satisfecho cu e cifranan, semper por ta miho. Pesey nos ta sigui haci nos best pa hisa e cifranan. Pero e ultimo cifranan a surpasa nos expectativanan.” Elbers a bisa cu KLM ta bay expande su biahenan. Awor e compania ta bulando cu Airbus y ta mira con por bin cu mas servicio. “Awor nos ta bulando cu seis avion loke ta suficiente, pero semper nos ta keda habri pa oportunidadnan nobo.”