Home Uncategorized Minister di Asuntonan Economico Richard Arends a habri E-Business Seminar cu discurso...

Minister di Asuntonan Economico Richard Arends a habri E-Business Seminar cu discurso alentador

SHARE

“Nos kier crea oportunidadnan y kier pa cada un di boso capitalisa riba e oportunidadnan aki”

ORANJESTAD- Den Renaissance Convention Center a organisa un E-Business Seminar riba entrepreneurship, social media y mobile marketing. Minister di Asuntonan Economico Richard Arends a habri e seminario cu un discurso alentador. El a enfatisa riba e topiconan di e seminario cu ta entrepreneurship, pero tambe a bisa cu loke algun aña pasa no tabata relevante, awendia no por sin dje mas cu ta social media ora di haci negoshi y mercadeo mobil.
“Di acuerdo cu OECD (Organisation for Economic Co-operation and Development) network digital a bira e pedalnan di brake di desaroyo. Nan ta di vital importancia pa e tres pilarnan economico, cu ta desaroyo economico, inclusion social y proteccion medio ambiental y den e proceso aki cu ta cana den forma acelera, Aruba no ta un excepcion. Aruba como miembro di Reino Hulandes a firma cu e lo cumpli cu 17 SDG nan. SDG ta e metanan sostenibel di Nacionnan Uni cu ICT como aporte di e otro 16 metanan.”
Arends a papia riba e rol di gobierno di Aruba cu desde 2010 a ehecuta un plan amplio di inversion riba tereno di infrastructura, areanan publico y energia. “E idea tras di nos propio ‘economic stimulus plan’ tabata pa jumpstart e economia y crea oportunidadnan nobo y hisa e calidad di Producto Aruba. Nos ta hopi bon den mercadea Aruba den exterior, incluso on-line (mercadeo digital), pero tambe ora e turista yega aki e ta wordo ricibi cu e ‘Happy Flow’ (sistema pa haci e fluho di pasahero bay den forma mas efectivo y acelera). ” Arends a splica cu esaki ta bay asina bon cu recientemente Aruba a gana un premio di ta e destinacion mas innovativo.
“Sinembargo. nos mester realisa cu nos ta para na e top di un cambio economico y nos kier crea oportunidadnan. Nos kier pa cada un di boso capilatisa riba e oportunidadnan economico aki. Nan ta den e areanan desaroya of cu ta wordo desaroya: Green Corridor, Watty Vos Boulevard, e area rond di dr HOH cu ta wordo reconstrui unda tin oportunidad pa turismo medico, waf di Barcadera, waf na Oranjestad y San Nicolas pa turismo y cultura.”
“E industria creativo, specialmente Mercadeo y Comunicacion cu ta parti di e top sectornan promovi door di gobierno sigur lo contribui na penetracion di digitalisacion den nos forma di haci negoshi y actividadnan comercial a base diario. Despues di a fortifica nos actividad economico mayor, rehabilita esun historico, nos mester sigui den nos accion coordina pa diversifica nos actividadnan economico. Pesey mes ta di vital importancia pa re-adresa start ups, comercio nobo y existente pa localmente bira mas comptetitvo riba un escala mas global,” Arends den e prome parti di su discurso a bisa.