Home Uncategorized Encuentro entre Eman y Gert-Jan Segers, lider di ChristenUnie tabata importante y...

Encuentro entre Eman y Gert-Jan Segers, lider di ChristenUnie tabata importante y inspirativo

SHARE

DEN HAAG/ORANJESTAD – Un di e lidernan politico cu Prome Minister Eman a tene un reunion cu ne ta lider di ChristenUnie Gert-Jan Segers. Presente durante e reunion aki tabata tambe Minister Plenipotenciario Juan David Yrausquin. Despues di e reunion Segers a duna su comentario con el a haya cu cos a bay. El a cuminsa na bisa cu e conoce Eman otro hopi tempo caba y p’e e encuentro tabata uno agradabel.

Segers: “Na e momentonan aki nos ta den un situacion politico un poco tenso ya cu mester bin un coalicion nobo y mester traha riba un acuerdo di gobernacion nobo. Nos no sa si ChristenUnie ta bay hunga un rol den tur esaki. Si mi por bisa cu nos enfoke ta pa mantene e relacionnan den Reino y specialmente cu Aruba, den forma estrecho. Riba e topico aki Eman y ami a tene un combersacion hopi bon.” Segers ta sigui bisa cu p’e e relacionnan ta importante, pasobra e islanan y Hulanda ta comparti un historia di hopi aña atras. “Pero loke Premier Eman cu tur rason a bisa ta cu e relacionnan aki mester keda bon pa futuro. Nos tin plannan conhunto, nos kier traha hunto na un futuro ‘berde’, nos kier tin bon envolvimento comercial hunto. Nos por nifica hopi pa otro, mescos cu Aruba a nifica hopi pa Hulanda den e lobbymento pa Hulanda haya un asiento den e Conseho di Siguridad di Nacionnan Uni. Di tur sorto di manera nos por yuda otro. Gustosamente mi kier yuda y traha hunto, ya cu nos tin hopi pa brinda otro”.

Premier Eman na su turno a bisa cu e encuentro tambe ameno y inspirativo. “No solamente nos ta comparti un vision pa loke ta Reino, pero tambe como partido (AVP) nos ta comparti parti di e ideologia di ChristenUnie. Norma y balornan cu ta inspira nos den nos trabou. Nos a papia di Reino, pero tambe con e comunidad mester ta y e retonan cu tin pa principalmente nos grandinan. ChristenUnie tin un vision cla con nos como comunidad mester keda envolvi cu nos grandinan, mustrando solidaridad na esnan cu a duna asina hopi na nos y como partidario nos mester para fuerte pa e derecho y proteccion di nos grandinan. E vision di ChristunUnie ta un cu nos por asimila. Nos por siña hopi di nan.”

Eman a bisa di a haya e encuentro cu Segers importante pa loke ta e parti encuanto e relacionnan den Reino, pero tambe con Aruba mester anda cu esnan vulnerabel.