Home Uncategorized SETAR hunto cu Ministernan Arends y de Meza y abogadonan local y...

SETAR hunto cu Ministernan Arends y de Meza y abogadonan local y internacional a splica di caso di fraude grandi den SETAR

SHARE

Esun cu e comete e fraude y su complicenan ta wordo persigui pa husticia Mericano

ORANJESTAD- Minister de Meza, Minister Arends, director di Setar Roland Croes y abogadonan di Setar na Aruba y na Merca, Patrick Brown y Benton Curtis, a tene un conferencia di prensa den cual nan a informa –  te con leu ta permisibel huridicamente – riba e situacion na Setar di un supuesto fraude di miyones cometi pa un empleado hunto cu su complicenan y e investigacion andando al respeto. E fraude a tuma lugar na Merca y ta pesey cu tin un abogado Mericano envolvi, tambe pasobra e caso penal ta bay ta na Florida. A yama e rueda di prensa pasobra e siman aki a habri cu hopi pregunta y frustracion di loke ta pasando.

Minister Richard Arends

Minister Arends, actual minister di comunicacion, a bisa cu e siman aki a keda publica cu tin un procedura legal tumando lugar na Miami pa loke ta trata un desfalco di cual Setar ta victima di dje dor di entre otro un di su empleadonan. “Na april 2016 e ‘Panama Papers’ a sali na cla y e lista di Aruba a bira publico. Riba e lista ey tabatin algun nomber cu a yama atencion di gerencia di Setar ya cu ta trata di un empleado di e compania nacional di comunicacion.” Minister Arends a splica cu a base di e informacion aki a start un investigacion unda Minister de Meza, e tempo ey encarga cu e cartera di comunicacion a wordo poni na haltura mescos tambe Richard Arends, hefe di su despacho e tempo ey. “A start un investigacion profundo y a base di esaki tabatin argumentonan suficiente pa por a cuminsa un caso hudicial.” Arends a splica cu Setar mesora a reinforsa institucionalmente e proceduranan di aanbesteding y a haci otro cambionan necesario. A screen tur compania di distribudor y proveedornan di tur loke Setar ta cumpra, no solamente cellular, pero tambe otro ekiponan. A percura tambe pa mobilidad den e departamentonan.  Arends: “Mi ta haya loke a sosode actonan lamentabel y inacceptabel, sigur pasobra ta trata aki di un compania estatal. Por papia di delitonan hopi serio. E investigacion a tuma lugar mesora y no a duna mucho publicacion na esaki. Nos kier trece unda por clarificacion y unda ta posibel contesta preguntanan.”

Minister Mike de Meza

Minister de Meza a confirma cu e investigacion ta algo cu ta canando algun tempo caba y cu esaki a cuminsa na momento cu e Panama Papers a bin den publicidad y varios nomber di compania y personanan priva a keda publica. “Den e caso specifico aki nomber di un empleado di Setar a aparece riba e lista. E tempo ey mi a wordo informa dor di director di Setar y tambe door di Raad van Commissarissen cu nan ta bay start un investigacion. Durante e investigacionnan aki a bin dilanti cu ta parce cu cosnan no corecto por a tuma lugar. A sigui un analisis cu expertonan local y internacional. Setar na cierto momento durante e procedura a retira e persona di trabou.” De Meza a bisa cu tur hende por a tuma nota di e articulo cu a sali den Miami Herald cu mesora a bira un discusion publico. E minister ta lamenta cu tin politiconan ta haci sensacion cu e asunto aki. “Mi ta kere cu cualkier politico den aña 2017 mester sa hopi bon cu e tipo di casonan asina ta cosnan serio cu nos a tuma tambe cu hopi seriedad. Banda di esaki tin e procesonan cu mester cana. Aki ta trata di un compania estatal di Aruba y nos lo kier a actua mas lihe, pero nos mester respeta e procesonan di investigacion. Nos abogadonan ta duna nos e consehonan ey tambe. Ora director di Setar y RvC a notifica mi di e caso aki, mi a sostene nan y a bisa nan cu e investigacion mester wordo haci den e forma mas corecto cu tin. Na fin di dia nos mester mira con recupera dañonan tanto material como inmaterial cometi contra e compania cu nos ta responsabel pe. Hunto y cu hopi cuatela nos ta trahando duro riba esaki.” Minister de Meza mas di un biaha a enfatisa cu director di Setar a cana e caminda corecto y cu e tin elogio pa esaki. “Loke a pasa ta inaceptabel y intolerabel y esnan cu a comete e fraude ta bay wordo poni responsabel pa loke nan a haci. Nan tin cu biba cu e consecuencianan.”

Roland Croes, director di Setar

“Loke nos kier a stress un bes mas como Setar ta cu di momento cu e asunto aki a bira conoci nos a tuma tur e pasonan cu un compania mester tuma pa haya sa mas lihe posibel kico ta pasando. Nos preguntanan tabata ‘con esaki tabata posibel y pakico un empleado di nos ta riba e lista ey.’ Aki ta trata si di un persona cu ta cumpra ekiponan pafo di e compania y nos no tin un bista riba dje cu ken e ta anda despues di trabou of banda di trabou. Ta pesey cu ta bon pa splica cu den Setar bo no ta wak e persona aki. Tur producto cu nos ta cumpra ta wordo paga. Pero ki sorto di deal of otro actividad ta tuma lugar cu otronan, nos no tabatin un bista riba dje. For di momento cu nos a mira su nomber riba e lista, nos a tuma e pasonan necesario.”

Benton Curtis, abogado di Broad and Cassel

Abogado di Setar na Miami sr. Curtis no por a bisa mucho pasobra e ta envolvi den un law suit cu a wordo deposita den corte federal na Miami, Florida. Si e kier a splica cu apesar cu bo tin como compania tur bo regla y policy na ordo – y Setar tabatin nan na ordo – bo ta haya hendenan den posicion halto manera sr. Koolman kende ta crea un fachada cu tabata indica cu e tabata sigui e reglanan. “Den nos pensamento cu hasta e miho y mas experencia controlador lo no a ripara esaki. E intencion di esnan cu ta comete fraude ta pa esaki nunca wordo detecta. Ta pesey cu semper bo mester haci bo huiswerk bon y tin bastante prueba, sigur ora ta trata di un compania estatal, prome bay over na haci acusacionnan. Setar a tuma e pasonan corecto pa busca e servicio di un tercer partido independiente pa haci e investigacion interno. Esey ta loke a sosode den e compania y podise tin hende a pensa cu por tabata FBI, pero esey no ta e caso.

Patrick Brown, abogado local di Setar

“Mi kier a splica en corto cu tin varios aspecto legal conecta cu e caso aki. Tin e aspecto di ley laboral cu mester a tene cuenta cu ne. Banda di esaki tin e aspectonan interno di Setar y e aspecto civil. Esey ta encera si ta purba di cobra e daño cu a wordo haci bek for di e persona aki y e hendenan cu a traha hunto cu ne. Pa e parti ey tin e aspecto di Aruba y esun di exterior. A dicidi cu e parti civil ta wordo haci na Florida, pasobra eynan mayoria di esnan cu e comete e fraude ta concentra. E ultimo aspecto ta esun criminal. Nos a papia cu e departamento di polis y fiscal na Aruba caba for di un comienso. Polis y fiscal a bisa cu lo ta miho pa investiga e asunto internamento prome ya cu e tempo ey no tabata bon conoci con e asunto aki a tuma lugar. Awor tin un miho bista cu a desemboca de un caso na Miami.”