Home Uncategorized Leonardo Winterdal, Jevahno Maduro y Arron Stamper a traha duro pa victoria...

Leonardo Winterdal, Jevahno Maduro y Arron Stamper a traha duro pa victoria di Warriors y Celtics

SHARE

ORANJESTAD – E celebracion di 85 aña di existencia di S.V. Aruba Juniors a continua cu su torneo di basketball y manera e slogan di e club ta bisa “Aruba Jrs – Un Famia”, e teamnan forma pa hungadornan di tur edad a diverti nan mes siman pasa, sin perde e intensidad y determinacion competitivo.

Diahuebs den division di junioren Aruba Jrs Marlins a gana di nan invitadonan, International School cu score di 37-11. ISA a habri e wega cu un 3-pointer, pero esaki no a spanta Marlins, ya cu nan a bin fuerte pa permiti ISA apenas 5 punto den e prome mitar: 23-5. Jevahno Maduro cu 9 punto y Marcos Gomez cu 8 a tuma e rol ofensivo, mientraa cu Bernie Adams a domina e boardnan cu 7. E produccion den di dos mitar a baha considerabelmente door di demasiado intento di 3-pointer inoportuno. Esey a pone cu e wega a termina 37-11. ISA no a hunga malo, pero nan no tabata productivo. Floris Bakius a bira nan topscorer cu 4 punto den e ultimo quarter.

E otro wega tabata den un division mixto di pasarella, cadet y junioren. E team Red tabata mucho mas efectivo cu Yellow, aunke cu esey no a manifesta su mes den e prome tempo. Red a termina 20-13 ariba, pero den di dos tempo nan a marca 35 punto pa gana e wega comodamente 55-23. E  victoria aki tabata pa gran parti debi na e productividad di Leonardo Winterdal, kende a termina e wega cu 25 punto y hanyando bon sosten di Jevahno, kende a logra un double-double di 13 punto y 10 rebound. Pa e team di Yellow, Woodberlin Chery a score 7 y Michael Charles 6.

Diabierne Jevahno a continua cu su dominio, hungando e biaha aki pa Warriors den e open-class, cu ta inclui tambe hungadornan di A-klas y Master. Heat a hasi un bon esfuerso pa keda cerca y sigur den e prome mitar no tabatin mucho diferencia, cu e score 23-22 na fabor di Warriors. Rafeek Karmoeddien a percura hunto cu Chris Placencio pa keda hala roseya cayente riba Warriors. Rafeek a termina cu 16 punto, mientras cu Chris tabatin un double-double cu 10 punto y 11 rebound. Den di dos mitar Warriors a cuminsa tuma ventaha y mediante e dos quarternan di 12-9 y 17-12 nan a sa di garantisa un victoria di 52-43. Genaro Helder a yuda cu su experiencia mas 9 punto y 9 rebound den e triumfo.

Den di dos wega tabatin un guerra di anotacion entre Arron Stamper di Celtics y Leonardo Winterdal di Cavaliers. Aunke cu Leonardo a gana e bataya cu 24 punto versus 20, tabata Arron cu su experiencia y assistnan cu a pone su coleganan briya y gana e wega 58-52, despues cu e prome tempo a termina 30-27. Christopher Auwerda a contribui bunita cu 12 punto den e victoria. Cedrick Pas a marca 11 punto y a piki 8 rebote pa e team perdedor.

E weganan ta tur Diahuebs y Diabierne riba cancha di Aruba Jrs, cuminsando pa 7’or.