Home Uncategorized Prome Minister Mike Eman a reuni cu TNO Energie pa fiha e...

Prome Minister Mike Eman a reuni cu TNO Energie pa fiha e proximo pasonan cu director nobo

SHARE

ORANJESTAD – Como parti di e agenda preta di trabou cu Prome Minister Mike Eman tin e siman aki na Hulanda, tabatin un reunion cu directiva di TNO Energie caminda a evalua e trayectoria te awo y tambe delinea e plan pa futuro. Minister President Eman a sinta specificamente cu dr. Mart van Bracht, managing director di TNO Energy y Eric Veldkamp, kende ta proximamente ta bira e director nobo na TNO Caribbean Branch.

Dr. van Bracht a duna di conoce cu e reunion cu Premier Eman a bay sumamente bon. “Nos a papia bon cu otro y a acorda riba e progreso. Nos tur dos ta contento cu ta bay asina bon na Aruba, cu TNO y cu Aruba,” asina e director di TNO a bisa. E proyectonan mas importante dilanti di porta ta e culminacion di e Smart Community y e proyecto di alga. Pa e prome, TNO a duna di conoce cu tin un interes grandi di parti di companianan Hulandes pa forma parti di e proyecto. Pa loke ta e proyecto di alga, nan ta wak esaki como un oportunidad nobo y fantastico pa nan y pa Aruba.

“Tin hopi interes pa cu esaki. Nos tin concretamente awo 15 compania cu a firma un MOU. Esey ta ya caba den e prome fase, sin cu ainda tin en realidad un edificio, y manera cu e desaroyo cana lihe, nos ta kere cu e interes lo bay sigui crece,” asina dr. van Bracht a declara. Den su mayoria ta trata di companianan di innovacion cu ta desaroyo tecnologia sostenibel y cu kier test esakinan den un clima tropical y bou situacionnan extremo; pero tambe ta trata di companianan cu kier habri mercado na America y for di Hulanda no por haci esey. “Aruba ta un springplank fantastico pa esaki, un pida di Reino Hulandes pero cerca di dos mercado grandi pa tecnologia nobo,” e director di TNO a bisa.

E proyecto ta programa pa keda cla den ultimo lunanan di e aña aki ora cu e prome casnan ta completo. Naturalmente tin companianan cu lo t’ey prome cu esey ya cu nan aparato y instalacion ta forma parti di e construccion.