Home Uncategorized Javier Wolter, Presidente Asociacion di Bankeronan “Banconan ta dispuesto pa yuda ciudadanonan...

Javier Wolter, Presidente Asociacion di Bankeronan “Banconan ta dispuesto pa yuda ciudadanonan yega na nan propio cas”

SHARE

ORANJESTAD – E siman aki Minister Benny Sevinger y un delegacion tabatin un reunion importante cu e Asociacion di Bankeronan, otro institutonan financiero y Fondo di Garantia. Tema principal di e encuentro aki tabata apela na e banconan pa ta mas flexibel cu nan condicionnan p’asina ciudadanonan por yega na construi nan propio cas.

Recientemente a yega na e fase cu ta bay otorga mil tereno. Gobierno a traha riba un plan unda cu si un tereno wordo otorga, e hendenan mester ta den posicion pa haya hypotheek tambe. Pesey a reuni cu sector bancario pa bini cu un maneho mas flexibel. Javier Wolter, Presidente di e Asociacion di Bankeronan, a bisa cu nan a haya informacion di Minister Sevinger y InfraTeam riba e plannan cu tin pa loke ta otorgamento di tereno pa construccion di cas den 2017.

Pero, el a bisa, punto principal ta cu Gobierno kier accelera e proceso pa un persona por haya un tereno. Den e proceso ey Gobierno kier pa banconan haci un evaluacion mas lihe posibel di cuanto placa un persona por haya presta pa construccion di su cas. “Basa riba e indicacion duna door di banco, cu ta wordo evalua a base di entrada di e cliente y loke e ta keda cune despues di cumpli cu su gastonan, ta duna e cliente un carta pa e por bay DIP pa aplica pa un tereno. Basa riba e evaluacion haci door di banco, ta haya sa con grandi e tereno ta cu e por bini na remarca pa haya, sea un tereno mediano of chikito.

Banconan ta haya cu loke ta hopi halto ta e costonan di construccion. Den e sector aki e prijsnan mester baha un poco. “E costonan di construccion ta keda halto si bo compare cu islanan manera Corsou, sigur pa m2.” E ta kere cu e gastonan ta encera un serie di factornan, manera invoerrechten, margen di ganashi, man di obra. Pues un combinacion riba cual mester traha riba dje pa e gastonan di construccion baha.

Pa loke ta e peticion di Gobierno, Wolter a bisa cu tur e cinco banconan na Aruba ta dispuesto y ta apoya e iniciativa di Minister Sevinger y lo bay pusha pa den e 9 lunanan cu falta di 2017 pa yuda mas tanto hende yega na nan propio cas. “Tur hende tin derecho di tin nan propio cas. Bo ta traha y bo tin e derecho. No tin nada mas dushi pa tin bo propio cas. E banconan ta dispuesto pa haci esaki posibel, mas awor cu Gobierno ta dispuesto pa accelera e proceso e ta bay ta un exito. Pronto hopi hende ta bay tin nan propio cas.”