Home Uncategorized Alcalde di Rotterdam Ahmed Aboutaleb “Eman ta pusha pa den e Gabinete...

Alcalde di Rotterdam Ahmed Aboutaleb “Eman ta pusha pa den e Gabinete nobo logra haya mas atencion pa e parti Caribense di Reino”

SHARE

ORANJESTAD/ROTTERDAM – Prome Minister Eman ta na Hulanda pa celebracion di Arubadag y ta haci uzo di e oportunidad pa reuni cu tanto gobernante, politico, empresario, institucionnan, como tambe studiante y demas Arubianonan bibando na Hulanda. Su agenda semper ta carga cu e bishitanan cu ta importante pa Aruba y cu tin un balor agrega pa e isla y su hendenan. Asina Relacionnan den Reino semper ta halto riba su agenda. Diaranzon Eman hunto cu Minister Plenipotenciario Yrausquin a reuni cu alcalde di Rotterdam Ahmed Aboutaleb, kende despues di e reunion a enfatisa cu papia cu Eman semper ta un momento agradabel p’e.

Aboutaleb: “Eman y ami conoce otro basta tempo caba y e contacto cu ne ta cariñoso y riba nivel personal. Mi ta haye un hende ambicioso pa loke ta haci su isla duradero, pa tin energia limpi y mas oportunidad pa trabou. Esaki ta e meta y ambicionnan tambe di e ciudad Rotterdam. Asina ta cu nos ta comprende otro. Eman ta reuniendo tambe cu lidernan politico aki pa ‘pusha’ pa den un Gabinete nobo tin mas atencion pa e parti Caribense di Reino. Mi ta haya esaki e bon momento y cerca mi e ta den bon compania. Mi ta un amigo di Aruba y mi ta kere cu ta bon tambe cu e ta conta mi kico e ta papia cu e partidonan politico na Den Haag.”

Aboutaleb a bisa cu e metanan cu Aruba tin en comun cu Rotterdam ta tur loke tin que ver cu transicion di energia y inovacion. Den e sector ey tin tambe oportunidad pa trabou. “Aruba ta evaluando si e isla por bira un hub pa loke ta transporte aereo y di barco pa Latino America y henter e region eynan. Mi ta sostene Aruba den e aspiracion ey. E ta brinda bentaha economico y ta bon pa Eman ta papia di esaki cu nos Minister di Finanzas cu ta esun encarga cu Aduana. Ta importante pa di e forma aki brinda Aruba un bentaha ora ta papia di comercio internacional”.

Alcalde di Rotterdam ta haya cu e islanan Caribense mester ta solido, confiabel y economicamente prospero, pasobra nan ta parti di Reino. “Mi ta desea tur parti di Reino, Texel, Groningen, pero sigur tambe Aruba, Corsou y demas islanan un futuro fantastico. Den e sentido cu si eynan cos ta bay bon, cerca nos tambe cos ta bay bon. Pesey mi a bisa Eman cu si e mester di ayudo tecnico, e semper por yama mi.”

Na final Aboutaleb a bisa di kier haci un bishita na Aruba y ta spera cu esey lo ta pronto. “Eman a bolbe haci mi un invitacion y ‘wat in het vat zit, verzuurt niet'”. Cu otro palabra, e invitacion tey y Aboutaleb tin’e den consideracion serio.