Home Uncategorized Diaranson lectura riba Salud Mental Infantil na MFA Paradera

Diaranson lectura riba Salud Mental Infantil na MFA Paradera

SHARE

ORANJESTAD – Siguiendo cu un di su diferente propositonan, MFA Paradera ta fungi como sede pa reunion, lectura y otro actividadnan publico. E siman aki tin uno sumamente interesante cu ta dirigi riba e salud mental di mucha y e relacion entre mayor y yiu for di nacemento.

Dia 21 te cu dia 24 di maart ta inicia e estudio di Specialista di Salud Mental Infantil na Aruba. E estudio aki tin un duracion di 2 aña y mey y ta wordo duna dor di docentenan di RINO Noord-Holland. RINO ta un instituto bon conoci den mundo di esnan cu ta sigui cursonan Post Master y Post HBO.

E estudio di IMH ta acredita pa diferente asociacion, manera entre otro, esun di enfermeronan, di pedagogonan (VNO), di psicologonan (NIP), etc. Despues di caba cu e estudio, e cursista ta bira un ‘Infant Mental Health Specialist’ y por bira miembro di DAIMH (Dutch Association Infant Mental Health).

E estudio su enfoke ta riba e chikitonan di 0 pa 3 y di 3 pa 5 aña y nan desaroyo y specialmente e relacion entre mayor-yiu. Delaster añanan tin hopi studio riba e celebro di e baby y con esaki ta wordo afecta prome y despues di e nacemento. Asina a haya sa cu e relacion di hopi tempran entre mayor y yiu ta yuda den regula e mucha su emocionnan.

En realidad ta asina cu e base di ta un bon ciudadano ta wordo poni caba den e prome 1001 dianan di e baby. Den e temporada aki nos por yuda optimalisa e chens di e baby pa e por crece y desaroya tur su abilidadnan. Na Inglaterra, por ehempel, ya nan tin di 2015 caba un “All Parliamentary Group for conception to age 2.  Nan rapport yama “Building Great Britons”. Na Hulanda ta purba yega na un grupo asina tambe. E asociacionnan cu tin de haci cu e edad di 0-3 ta purba mobilisa e politiconan pa cu esaki.

Aworaki tin 17 hende, cu un master of estudio HBO+ na Aruba cu ta bay sigui e curso. Entre nan tin enfermero infantil di Wit-GeleKruis, tin ortopedagogonan, psicologonan, dokter di mucha, dokter di JGZ y  dietista cu ta traha cu mucha, como tambe participantenan di Boneiro, Corsow y Saba.

Riba peticion, RINO  ta ofreciendo un charla pa publico en general tocante e topico central di e estudio. E charla aki ta tuma luga diaranson 22 di maart, di 7’or pa 9’or di anochi na Cas di Mita cu ta MFA Paradera. E titulo ta “E prome 1001 dianan; crucial pa e desaroyo di e relacion entre mayor y yiu.” Entrada ta gratis y e charla ta presenta den idioma Hulandes. Pa mas informacion, por yama Lupina Croes na Wit Gele Kruis Dakota na 523-4415.