Home Uncategorized Desde awe 22 di maart esnan interesa pa maneha Cafetaria di MFA...

Desde awe 22 di maart esnan interesa pa maneha Cafetaria di MFA Savaneta por busca e documentonan di TOR

SHARE

ORANJESTAD – E trabounan na edificio MFA Savaneta ta avansa y ta momento pa cuminsa cu e preparacion pa e edificio habri su portanan oficialmente pa publico. Den cuadro di esaki Kimberley Boekhoudt, Manager MFA Savaneta, a informa cu a cuminsa cu organisa destaho publico pa operacion di e cantina di MFA Savaneta.

E edificio di Savaneta ta wordo entrega final di juni pa cuminsamento di juli di e aña aki y a cuminsa duna rondleiding na esnan cu ta bay traha den e edificio. Tambe ta cuminsa cu e proceso pa otorga e permiso pa operacion di e cantina di Savaneta. Den cuadro di esaki sra. Boekhoudt a splica cu ta momento pa otorga e documentonan conoci como Terms of Reference (TOR), cu ta e documentonan cu ta contene informacion encuanto maneho di e cafetaria. Desde awe, 22 di maart, te cu 29 maart por busca un copia di TOR na MFA Noord y Paradera, pero tambe na e Oficina Auxiliar di Gobierno na Savaneta.

MFA Savaneta ta organisa un mainta di informacion, cu ta tuma luga dia 5 di april na MFA Paradera, pa 10’or di mainta y ta duna un splicacion detaya di e TOR y con e procedura di e destaho publico lo ta. Importante den e procedura aki ta cu esun cu participa mester ta un compania registra na Camara di Comercio. Demas regla y condicionnan ta wordo describi den mas detaye den e TOR.

MFA su construccion ta hopi avansa y aworaki ta poniendo tegels y despues ta sigui cu trabou di verf e edificio. Aunke cu e trabou no ta cla, por bisa cu practicamente tur e espacio disponibel a wordo reserva caba. Sra. Boekhoudt ta sigur esaki ta un edificio cu Savaneta tabatin mester di dje y e reaccionnan ta positivo. “E ta algo positivo pa e bario di Savaneta mirando cu e ta un edificio Multifuncional, brindando diferente servicio importante pa pueblo di Savaneta y Aruba henter en general.”