Home Uncategorized Prome Minister orguyoso di a logra ‘Batting Cage’ pa veld di Calabas

Prome Minister orguyoso di a logra ‘Batting Cage’ pa veld di Calabas

SHARE

ORANJESTAD – Recientemente Rockets Baseball Organization a inaugura y mientras tanto ta haciendo bon uzo di nan ‘batting cage’. E siman cu a pasa a keda finalisa instalacion di e ‘Batting Cage’ riba veld di Calabas. Un herment sumamente importante den desaroyo di hobennan basebolista na Aruba.

Prome Minister Eman na momento di e inauguracion a splica di tabata sumamente contento cu e proyecto di un ‘Batting Cage’ pa veld di Calabas a keda instala y finalisa. A haya cooperacion di ATCO, cual compania a basha e fundeshi y a yuda e ekipo di softball, pero tambe Kiwanis cu tabatin un contribucion grandi na e ekipo Hammershark, Lotto cu a patrocina e yerba, esnan cu ta maneha e veld di Calabas y sin lubida tambe tur boluntario, chikito te grandi. Prome Minister Eman a gradici tur pa nan sosten, cooperacion y trabou den e bunita proyecto aki.

E mandatario tabata hopi emociona di mira asina hopi mucha, hoben y adulto cu a acudi na inauguracion di e ‘Batting Cage’, cu a wordo dedica na Detchi Tromp (dfm), kende tabata un persona cu un curason grandi pa Calabas y semper a traha pa mantene e veld den condicion pa e wordo uza door di habitantenan di e bario. “E ta un di e pioneronan, hunto cu su famia, cu a carga e veld di Calabas. Pesey tabata un honor pa dun’e su reconocemento awe den presencia di su esposa, sra. Lea, kende tambe tabata hopi emociona cu e dedicacion na su esposo. Ami tabata yame e Alcalde di Calabas, luchando semper pa e veld y su bario.” E mandatario a recorda con Detchi tabata comparti loke cu e pisca cu tur esnan cu bishit’e. “Den su veranda patras ta hopi hende a sinta come, inclusive mi persona,” Prome Minister Eman a expresa. El a agrega cu e dedicacion y amor grandi di Detchi pa su bario, a dicidi cu ta pone e batting cage na su nomber.

Prome Minister Eman a expresa e atardi aki, cu Departamento di BoBario di su Ministerio ta trahando awor riba e otro proyecto pa e bario di Calabas, cu ta luz pa e veld. Aworaki e veld por wordo uza unicamente den dia. El a bisa esnan presente “nos tin e fondo inicial pa e luz cu nos a logra pone hunto cu esfuerso di BoBario, pero e suma no ta suficiente ainda. Sinembargo nos ta sigur cu e proyecto ey tambe lo wordo realisa den nomber di Detchi y Leon, kende ta traha duro pa e club.”

Por a sinti un gradicimento hopi grandi di e deportistanan di e bario pa loke Gobierno ta realisa pa promove deporte den e bario. Prome Minister Eman a crea un grupo di boluntario cu a yuda drecha e cura y tribuna na e veld di Calabas.

E vision di Gobierno di Aruba ta cu na Aruba tur veld mester por tin tur e hermentnan pa por duna e hoben deportistanan e miho sosten cu ta posibel pa nan desaroya nan mes. Asina a cuminsa cu iniciativanan pa por logra esaki pa tur skina di Aruba, aunke e trabou ta uno grandi y extenso, a pone man na obra pa asina por logra e meta pa tur deportista por tin e miho hermentnan na nan disposicion. Deporte pa e mandatario ta un forma pa crea un generacion di hobennan sano cu ta futuro lidernan di e pais.

Banda di sostene y activamente participa den restauracion di veldnan rond di Aruba, instalacion di ‘Batting Cages’ ta un herment sumamente importante pa desaroyo di basebolistanan na Aruba. Mescos tambe, cu sosten di FCCA y Team BoBario, Prome Minister a inaugura mini-veldnan di yerba artificial cu ta un otro herment sumamente importante pa Aruba su hoben futbolistanan.