Home Uncategorized Dirigente di Hammershark : “Cu instalacion di batting cage un soño a...

Dirigente di Hammershark : “Cu instalacion di batting cage un soño a bira realidad”

SHARE

ORANJESTAD – Pa e organisacion deportivo Hammershark e ta un soño cu a bira realidad. Instalacion di un ‘batting cage’ riba veld di Calabas a keda completa. E ta un instrumento cu cualkier ekipo deportivo ta soña pa tin na nan disposicion pa por brinda un miho training na su miembronan. Esaki a wordo logra danki na intermediacion di Prome Minister Mike Eman y su team BoBario.

Siman pasa e batting cage, cu a keda dedica na Detchi Tromp (dfm) a keda inaugura den presencia di entre otro miembronan di team di ‘Hammershark’. “Awe ta un dia grandi pa Hammershark y deporte di baseball. Un danki grandi pa e sponsornan, Gobierno di Aruba cu a mira e necesidad di e deporte di baseball cu ta creciendo e ultimo añanan, mirando con nos peloteronan ta destaca internacionalmente den e deporte aki,” Gregory Melano di e organisacion Hammershark a bisa.

Melano tabata hopi entusiasma y agradecido cu e regalo aki logra door di Prome Minister Eman y su Gobierno, ya cu cu un batting cage na nan disposicion tin posibilidad cu mas pelotero Arubiano lo por hunga weganan internacional na un bon nivel. Mirando cu Gobierno, despues di a mira e necesidad di un batting cage a realisa esaki, e ta positivo cu nan deseo pa haya luz riba veld di Calabas tambe lo wordo realisa door di Gobierno.

Kiwanis Palm Beach di su banda tabata un di e orguyoso sponsornan, hunto cu ATCO. Cheito Croes a expresa cu “di nos parti nos ta sumamente orguyoso di ta aki presente como un di e sponsornan di Hammershark”. E relacion di Kiwanis y e organisacion deportivo Hammershark no ta algo nobo, ya cu nan tin varios aña dunando un cooperacion na e ekipo. Nan ta contento di por a contribui cu e batting cage, ya cu esaki ta un proyecto mas duradero y ta brinda e posibilidad pa mas mucha train riba dje. E bunita di e proyecto aki, el a bisa, ta con diferente instancia a yuda pa e soño di Hammershark keda realisa.

Otro sponsor den e proyecto aki ta Lotto pa Deporte, representa dor di su director, DiStefano Wernet: “Nos tey semper pa yuda pasobra deporte y educacion ta e fundeshi pa nos hobennan cu ta e futuro di Aruba”. El a agrega cu inmediatamente despues cu Prome Minister y Minister di Deporte a papia riba e proyecto aki, nan a bisa di ta dispuesto pa yuda. Tambe cu e vision di Public Private Partnership ta valido pa yuda deporte progresa. E batting cage ta uno hopi sofistica, pasobra e ta bin tambe cu e “pitching machine”. Den e prome fase di e proyecto aki cu ta wordo realisa bou guia di Team BoBario, ta instala 6 batting cage y e intencion ta pa un total di 12 batting cage wordo poni riba veldnan rond di Aruba.

E vision di Gobierno di Aruba ta cu na Aruba tur veld mester por tin tur e hermentnan pa por duna e hoben deportistanan e miho sosten cu ta posibel pa nan desaroya nan mes. Asina a cuminsa cu iniciativanan pa por logra esaki pa tur skina di Aruba, aunke e trabou ta uno grandi y extenso, a pone man na obra pa asina por logra e meta pa tur deportista por tin e miho hermentnan na nan disposicion.

Banda di sostene y activamente participa den restauracion di veldnan rond di Aruba, instalacion di batting cages ta un herment sumamente importante pa desaroyo di basebolistanan na Aruba. Mescos tambe cu sosten di FCCA y Team BoBario, Prome Minister a inaugura mini-veldnan di yerba artificial cu ta un otro herment sumamente importante pa Aruba su hoben futbolistanan.