Home Uncategorized A.T.A ta felicita comunidad cu inauguracion di Plaza Padu y ta orguyoso...

A.T.A ta felicita comunidad cu inauguracion di Plaza Padu y ta orguyoso di por a inverti den un proyecto cu ta embeyece centro di ciudad

SHARE

ORANJESTAD – Como parti di esfuerzonan dirigi riba un producto Aruba cu ta keda na un nivel halto pa ambos nos bishitantenan como habitantenan, na 2015 a amplia e papel di A.T.A. asina dunando e espacio pa inverti den projectonan cu lo engrandece e experencia pa nos bishitantenan como nos localnan. Asina A.T.A. a bai di ta e organisacion responsabel pa mercadeo di nos isla (Destination Marketing Organisation) pa ta e Destination Marketing & Management Organisation (DMMO) cu ta inclui enfoce riba desaroyo di nos producto turistico. Atencion ta ser poni entre otro na nos playanan, seguridad, tayernan di training, y promocion di nos herencia cultural.  Varios Proyecto ta ta wordo ehecuta man den man cu DOW, ku kende A.T.A. ta traha di serca primordialmente ora ta trata proyectonan infrastructural.

Plaza Padu ta ehempel di e colaboracion aki. Ta asina cu e areanan di San Nicolas y Oranjestad, y nan desaroyo turistico, a wordo delinea como puntonan di enfoce bou di e capa di ‘desaroyo di producto’ entre otro. Plaza Padu ta forma parti integral di e plan di desaroyo pa embeyece Oranjestad. Hunto cu Coshecha, Plaza Padu lo mester brinda un otro area cultural den nos centro di ciudad unda por admira arte y cultura di Aruba. E plaza ta honra nos tata di cultura, Padu Lampe, pero  tambe Rufo Wever y Lio Booi, cu hunto a composita nos himno ‘Aruba Dushi Tera’. A pidi artista local, Ciro Abath pa traha un obra artistico cu lo mester ilustra con nos himno a wordo composita. For di aña 2015 A.T.A. a cuminsa inverti den e proyecto importante aki cu a culmina den e inauguracion di e plaza diabierna ultimo, net na tempo pa asina celebra nos dia nacional di Himno y Bandera. Riba e projecto aki A.T.A. a traha serca cu DOW, Van Kessel Havenbouw pa asina por percura pa e projecto wordo realisa.

A.T.A. ta kier felicita e pueblo di Aruba, Gobierno di Aruba y Tourism Product Enhancement Fund –kende tambe a inverti den e Proyecto aki– cu inauguracion di nos Plaza Padu y alabes kier gradici DOW, van Kessel havenbouw, otro socionan pa e bon coperacion durante e projecto aki. A.T.A. lo keda enfoca riba inversionnan cu ta eleva calidad di nos producto turistico y ta cuadra cu maneho turistico delinea pa e proximo anjanan, cu ta inclui sigur ‘embeyecemento di nos producto’ y ‘mas presencia di nos cultura y locual ta autentico di nos Aruba’ den e experiencia di e bishitante, cu claro ta permiti nos cumindad tambe pa beneficia di dje.