Home Uncategorized Elton Lioe-A-Tjam (ABO): Proyecto ‘Zoetry Isla di Oro’, ni awe, ni mañan....

Elton Lioe-A-Tjam (ABO): Proyecto ‘Zoetry Isla di Oro’, ni awe, ni mañan. Pero nunca!

SHARE

Mientras cu gobierno tabata ofreciendo pueblo atrobe tur sorto show di 18 Maart, pa asina sigui tapa wowo di algun hende, e desaroyador di e proyecto ‘Zoetry Isla di Oro’,  Sr. Franz Sydow, a cuminsa su campaña di manipulacion y intimidacion. Cu asombro nos por a lesa den NoticiaCla  di 14 Maart 2017, con e desaroyador ta bisa: ‘Para e proyecto di Zoetry Isla di Oro, no ta un opcion aworaki’, pasobra:

  • e area ta den peliger, e mangrove ta muriendo, e coralnan ta na peliger’;
  • a gasta 500 mil dollar den e investigacion ambiental’;
  • e tin placa, e tin e plannan’;
  • NOS INTENCION ta pa gobierno finalisa e ROP (Ruimtelijke Ontwikkelings Plan) mas lihe cu ta posibel, pa nos por cuminsa..E ROP MESTER wordo entrega den e proximo luna of algo asina’;
  • Nos ta na un punto di no retorno. No cuminsa e proyecto, no ta un OPCION AWORAKI’.

Cu otro palabra, e desaroyador kier bisa pueblo, cu e mester haya e pida di costa aki, pasobra sin dje e mangrovenan lo muri y cu su proyecto ta e salbacion. Ki hilaridad y ki arogancia. Mangrovenan ta filters natural unda semper lo tin acumulacion di lodo y cualkier tipo di contaminacion. Cu mangrovenan mester di un bon fluho di awa pa keda saludabel, esey ta logico. Pues e solucion proponi pa e desaroyador, no ta nada nobo. Esaki por wordo realisa hopi facil (y barata), sin ayudo di un desaroyador.  Loke si e desaroyador ta mustra cu su investigacion, ta cu poco atencion a y ta wordo duna na e cuido di nos medio ambiente. Cu e desaroyador supuestamente a paga 500 mil dollar pa un investigacion ambiental, no ta pueblo su asunto. Un estudio ambiental ta forma parti di e exigencianan pa haya un permiso. Cu e la paga supuestamente un suma asina halto pa su investigacion, no mester tin influencia riba e decision pa otorga un permiso. Den nos humilde opinion, si e suma mes ta corecto, anto e la paga demas of kisas aki tambe e wega di ‘opklopperij’ ta wordo practica. Den tur proyecto of inversion, tin un componente di ‘Investor’s Risk’. Wel miho e desaroyador corda riba esaki en bes di trata di cambia esaki den un ‘Investor’s Guarantee’. Ta e desaroyador a bin cu e iniciativa, pues tur riesgonan tambe mester ta pa e desaroyador y no pueblo!

E maneho di zonificacion, cu desde hopi aña ta wordo aplica pa nos costanan, ta cu no ta wordo construi riba nos beach of costanan. E motibo tras di esaki ta, e areanan aki no solamente ta areanan proteha, pero nan ta patrimonio di pueblo cu mester keda den man di pueblo pa asina garantisa cu nan semper lo keda accesibel pa pueblo su uzo. Cu durante diferente gobernacion, hopi construccion ilegal a sosode riba nos beach of costanan, pa despues esakinan a wordo legalisa, nunca por ta un hustificacion pa sigui cu e maneho di entreguismo, anti ley, anti pueblo y anti naturalesa. Den e comunicado, tambe e desaroyador kier uza diferente ehempel di proyectonan similar cu a wordo realisa na diferente paisnan, como excuus dicon e proyecto aki mester wordo desaroya na Isla di Oro. Atrobe esaki no ta un punto di peso. Pasobra nos por duna hopi mas ehempel unda proyectonan similar no a sali na beneficio di pueblo of naturalesa!

Cu e desaroyador ta ‘DISPUESTO pa hunto cu gobierno, pa contribui hunto cu NGO’s pa forma un directiva y traha como socionan pa salba e area aki’, ta mustra hopi bunita riba papel y hasta serio. Den realidad esaki ta un otro forma pa haya sosten di algun NGO’s, cu ta dispuesto di bandona nan idealnan ambiental pa ‘fabornan personal’. Den pasado e mesun tactica aki di silencia algun bos ambiental, a wordo uza pa ‘bulldoze’ proyectonan di ‘Dump Parkietenbos’ y ‘Black Corridor’.

Un ley of un plan di ROP nunca por wordo cambia, pasobra un desaroyador a bira un ‘bon amigo’ di un gobernante. Husto e falta y implementacion corecto di un bon maneho ambiental y zonificacion, a conduci cu awendia tin hopi problema y conflicto den barionan. Loke e desaroyador a declara publicamente, cu su proyecto lo sigui pasobra e ROP lo bay wordo cambia pa haci su proyecto posibel, ta mustra cu e tin poder riba cierto politiconan. E pregunta ta, ken e desaroyador a soberna y kende lo ta esunnan cu lo bay vota ‘voor’ pa cambia e ley y e plan di ROP pa asina mas patrimonio wordo entrega? Ban wak kende lo bay scoge atrobe pa un cabay di campaña, manera nan a haci cu e ley desastroso di ‘CITGO-deal’, en bes di scoge pa Aruba.

Nos tur sa cu e ex-minister di Turismo tabata un luchado ferviente di e proyecto ‘Zoetry Isla di Oro’. Nos tur sa tambe cu e firmamento di permiso pa algun proyecto hotelero tras di lomba di e ex-minister, tabata un di e motibonan cu a conduci cu e la bay anuncia su retiro cerca gobernador na comienso di aña 2016. Pueblo por ripara cu desde e ex-minister a bandona su partido despues di 27 aña, tur su proyectonan ta wordo investiga y cambia. Awor dicon e proyecto di ‘Zoetry Isla di Oro’, no ta haya e mesun trato? Straño no?

Partido ABO ta sostene cualkier desaroyo economico cu ta na bienestar di pueblo, su futuro generacionnan y su naturalesa. Nunca nos lo sostene un proyecto cu ta contra un di e principionan aki. Tampoco nos lo por wordo soberna, cumpra, intimida of silencia pa defende esakinan. Nos beach y costanan mester keda sin construccion, habri y accesibel pa pueblo. E cuestion di manipula pueblo atrobe cu e asunto di cupo di trabou, pa asina sigui entrega mas patrimonio pa algun hende bira mas miyonario riba custia di pueblo, mester stop awo. Suficiente di nos beach of costanan a wordo entrega caba. Nos prome minister a declara internacionalmente cu e la wordo ‘verkracht’. Wel e cuestion di ‘verkrachtiging’ aki di Aruba tin cu para. E mangrovenan di Isla di Oro no mester di ningun limosna di un desaroyador pa ‘yud’e’ recupera. Naturalesa semper a sa di cuida su mes y esey lo sosode atrobe cu e ayudo di nos tur. E meta principal di e desaroyador ta pa kita un otro pida beach y costa for di pueblo, pa asina e por bay gana miyones. Pues pueblo, refleha y haci bo mes e pregunta, kico ta mas repugnante of desastroso, Entreguismo, Arogancia of Soberbia? Proyecto ‘Zoetry Isla di Oro’, ni awe, ni mañan. Pero nunca!