Home Uncategorized Brazil Ceres ta gana prome wega di Powerade Playoff Series

Brazil Ceres ta gana prome wega di Powerade Playoff Series

SHARE

TSean Martina ta Player of the Game

ORANJESTAD , Aruba 17 maart 2017 : Diahuebs despues di e prome wega di Powerade Playoff Series a anuncia cu e pitcher di Brazil Ceres, esta TSean Martina a keda scogi como Player of the Game pa su bon prestacion durante di e wega cu a tuma luga den Stadion Nady Croes/Crismo Angela na Santa Cruz. Brazil Ceres a derota ATCO Indians cu un score di 14 -3 .Powerade Playoff Series ta e play off di liga AA cu ta e liga mas halto na Aruba, y e ta wordo hunga “best out of five”. Cu Aruba su Himno interpreta pa e gran cantante Roderick “ Rocco “ Franken a duna inicio na e anochi aki. Prome pitch tabata den man di Jesus “ Chu “ Halabi pa asina duna inicio oficial di e Playoff series.

E siguiente wega ta tuma luga dialuna “on their own turf” pa Brazil Ceres y e ekipo y nan mangaer ta entusiasma cu nan ta hunga cerca di cas pa e publico cu semper ta duna un sosten grandi na nan ekiponan. San Nicolas semper tin bon fanatico di baseball cu ta bay wega ora cu e weganan ta na San Nicolas, y Brazil Ceres ta spera di mira hopi fanatico na e wega na Joe Laveist Sport Park dialuna.

“Mi negoshi ta strike, si bo tira bola mi ta bati bancrut,” asina manager di Brazil Ceres, esta Greg Manuela a laga sa na e conferencia di prensa despues di e wega. E tabata referiendo na e wega cu nan a caba di hunga, unda cu el a tuma decision di cambia e pitcher cu a cuminsa e wega, como cu tabata mirando demasiado bola, cual ta duna e otro ekipo un chens pa avansa.

E decision a beneficia henter e ekipo, como cu nan a gana e wega, y ademas e pitcher, Martina, a haya e titulo di hungado di e partido.

Powerade a regala a pitcher un “tray” di Powerade pa su esfuersonan.

Brazil Ceres ta un team cu ta “on” henter anja”, y danki na e sponsornan cu tin luz na e veld por haci uzo di e veld cualkier ora di dia pa train tambe, e manager a bisa, agregando cu e ta hopi contento cu e hungadonan kende haci un esfuerso pa t’ey y train henter anja.

E strategia di Manuela ta cu prome cu cada wega e ta mira kico e otro coach a scoge como su starting lineup y asina ta scoge su lineup. E ta scoge e pitcher entre e hungadonan cu ta pidi pa ta starting pitcher, y si tin motibo ora cu ya e wega ta aden, e ta haci e cambionan necesario.

E manager ta hopi contento cu su team cu ta mustrando animo, hopi confiansa y e hungadonan tin confiansa den otro. E ta haya cu ATCO Indians a hunga nalo diahuebs, pero sigur ta posibel cu nan por bin cu un sorpresa y bon wega dialuna.

Di parti di ATCO Indians, nan manager Eugene Helder a bisa cu tabata bisto cu tur cos a bay robes, pero ta admiti cu e ekipo mes den su totalidad no por a spera algo si nan no ta traha p’e. E ekipo no a train, el a agrega.

E ekipo tin hungadonan cu lesion, tin hungadonan cu ainda no tin suficiente experiencia, hungadonan cu ta ocupa cu trabao, y asina tin otro retonan cu ta haci nan zwak.

Helder a bisa cu e resultado di e wega di diahuebs sigur ta un “wake up call” y dialuna lo mester mira mehoracion y un otro calidad di wega.

E prome wega mester benta tras di lomba, el a pasa, y awo mester traha pa presta miho dialuna y pa e resto di e playoffs, Helder a laga sa.

Finalmente miembronan di prensa a puntro Dijon Martina con e ta pa ta e prome “Player of the Game” di Powerade Playoff Series. E hoben a contesta cu ta sinti bon; y cu orguyo a bisa cu el a haya un chens y a carga e team.