Home Uncategorized Artistanan preparando pa honra Padu riba 17 di maart

Artistanan preparando pa honra Padu riba 17 di maart

SHARE

ORANJESTAD – Contratistanan ta poniendo e ultimo tokenan na Plasa Padu, cual lo keda inaugura riba diabierna, 17 di maart, 2017. Na otro banda artistanan ta preparando pa rindi honor na Tata di Cultura y co-autor di himno nacional di Aruba den un show sin igual riba e mesun fecha menciona.

Den fin di siman cu ta tras di lomba e obra di e artista Ciro Abath a wordo transporta pa Plasa Padu. Ta trata di un estatua unda cu por mira Padu sinta na piano y banda di dje e otro musiconan cu a colabora na himno di Aruba, esta Rufo Wever y Lio Booi.

Prome lo tin un ceremonia riba Plasa Padu durante cual por mira mensahe di artistanan di diferente generacion bisando “Padu ta nos inspiracion” cu ta wordo pasa riba un pantaya grandi. Hopi ta e artistanan cu no solamente ta admira Padu pero tin un gradicimento special p’e. Asina por menciona Doedel Sophia kende a participa den e Concierto di Siglo dedica na Padu y kende a wordo cataloga como e “cuartista oficial di Padu” door di e propio Tata di Cultura. “Mi tabata un hoben di 16 aña ora cu Padu a acepta pa mi toca Cuarta cune. Como un mucha homber jong Padu del Caribe a bin te cas pa pidimi toca Cuarta, den un actividad di dje. E tabata un di mi soñonan, esta di por toca cu Padu un dia. Pesey e tabata un soño grandi cu a bira realidad. Nunca antes mi a wak Padu personalmente, solamente na television. Y el a bin te mi cas y como cu e tabata un actividad formal, mi a bisti mi bachi tres ora prome caba. Mi a bisa henter bario cu mi ta bay toca cu Padu y nan no tabata kier a kere,” Sophia ta corda cu hopi orguyo. El a corda tambe cu e tabata cana cu su cuarta 24 ora pa dia.

E tempo ey Padu tabatin su propio grupo y tabata conoci. Pesey Padu tabata un inspiracion grandi pami como Musico. Despues mi a sigui toca cun’e de bes en cuando y un biaha na Corsou otro soño grandi di Sophia a bira realidad ora cu “Padu a declarami como su Cuartista oficial. E ta cosnan cu nunca mi por lubida den mi bida.” Doedel Sophia su otro encuentro bunita cu Padu tabata ora cu el a participa den e Concierto di Siglo dedica na Padu del Caribe. Pesey pa por celebra e bida di Padu na e momento aki, pa honra e gran musico y artista aki ta un orguyo inmenso pa Doedel Sophia. “Danki na Tata Dios cu ainda nos tin’e cu nos,” e musico a finalisa bisando.

E conocido cantante y musico Papito Raphael ta comparti e pensamento aki. “Mi un musico sumamente privilegia di por a biba pa conoce autor di nos himno Padu. Kende hunto cu Rufo Wever y Lio Booi a compone. Mi tabatin e privilegio di por a participa den e combo di Padu den e Concierto di Siglo, cual ta un biaha a sosode. Hopi di esnan cu a participa den e concierto no tey mas. Pami e tin un luga hopi grandi den mi curason como un musico Arubiano.”

Tur e artistanan aki y hopi mas lo rindi honor na Padu diabierna awo riba Plasa Padu y despues cu un concierto riba Plasa Daniel Leo.