Home Uncategorized Ta spera cu iniciativa exitoso di Minister Michelle Hooyboer-Winklaar lo continua den...

Ta spera cu iniciativa exitoso di Minister Michelle Hooyboer-Winklaar lo continua den futuro

SHARE

ORANJESTAD, Aruba – 9 di maart 2017: Ora un iniciativa ta exitoso, ta surpasa cada aña tur expectativa y ta bira practicamente un tradicion pa un grupo grandi di persona den nos comunidad, pero e persona cu ta organis’e y ta sostene 100% ta dicidi di haci un cambio grandi den su carera, ta di spera cu e iniciativa aki toch conoce continuidad. Esaki tabata e remarca cu mayoria participante na e conferencianan anual pa Dia di Hende Muhe a expresa di un forma of otro na momento cu Minister di Enseñansa y Famia y den pasado Minister di Asuntonan Economico y Asuntonan Social, esta Michelle Hooyboer-Winklaar a anuncia cu e ta caba su termino como mandatario y e aña aki ta tuma despedida di politica.

E conferencia pa Dia di Hende Muhe a cuminsa como un evento pa trece hende muhenan den nos comunidad hunto cu un cantidad di meta hopi amplio, pero basicamente pa celebra e ser humano muhe di tur edad y den tur su facetanan.

Entre e metanan ta pa comparti tocante di topiconan y temanan di interes general y comun pa hende muhenan rond mundo, pa crea conscientisacion pa e importancia di e papel cu e hende muhe ta hunga den cualkier comunidad, y pa crea relacionnan y sistemanan di apoyo entre e hende muhenan na Aruba.

Lisenny Croes tabata entre e 800 personanan cu a participa na e conferencia e aña aki. Tabata su prome conferencia di hende muhe y el a atende hunto cu su rumannan. Lisenny Croes ta un ama di cas cu un trabao part-time na Blue FM, unda cu e ta traha tur mainta for di 6:30am pa 9:00am. El a splica cu prome e tabata duda un poco, como cu e no ta custumbra cu eventonan manera e conferencia aki, pero el a invita su rumannan y hunto nan tabata disfrutando di e mainta. Lisenny Croes ta agrega cu e presentacion di Minister Michelle Hooyboer-Winklaar tabata hopi bunita, como cu el a presenta con damanan por ta politico y mester wordo respeta den comunidad, pero tambe e parti cu e respet pa hende muhe como ser humano y cu e hende muhe tin asina tanto pa ofrece den comunidad a resalta pe.

Un otro orador cu a capta Lisenny Croes su atencion y a impresion’e hopi tabata Murielle Brown-Roos. E ta considera e conferencia aki uno espectacular y loke sigur e ta hiba cune for di e conferencia ta cu hende muhe por sobresali den tur decision cu nan tuma.