Home Uncategorized Prome Minister Eman “Watty Vos Boulevard, e proyecto di Infrastructura mas grandi...

Prome Minister Eman “Watty Vos Boulevard, e proyecto di Infrastructura mas grandi di Aruba ta cuminsa

SHARE

ORANJESTAD – “Awe mi ta aki pa papia riba un proyecto hopi importante pa comunicacion y desaroyo di Arua. Un proyecto cu ta esun di mas grandi cu pais Aruba a conoce te awor,”Prome Minister Mike Eman a bisa den conferencia di prensa dialuna mainta. Presente tabata Minister di Infrastructura Benny Sevinger, Director di DOW ing. Marlon Croes y henter e team cu a prepara e proyecto aki for di investigacion, diseño te na e financiamento.
Watty Vos Boulevard ta un di e cuatro proyectonan cu e dos Gabinetenan Mike Eman a bin ta trahando riba nan e ultimo 7 añanan. Proyectonan cu a wordo inicia mas di 30 aña pasa bou di diferente Gobierno. Ta papia aki di Watty Vos Blvd, Green Corridor, Expansion / Renobacion Hospital y Haf di carga nobo na Barcadera.
“Pa hopi aña nos a bin ta trahando riba e desaroyo di un proyecto den comunidad cu ta conoci como “ringweg”, un caminda cu ta pasa rond di Oranjestad pa facilita e trafico cu na e momentonan aki ta congestiona.”Na varios ocasion a splica cu e conexion entre aeropuerto y e zona hotelero, mirando cu haf di carga pa Barcadera a keda cla, t’asina importante cu e caminda mester cana paralelo cu esun di Green Corridor cu ta yega te San Nicolas. Intencion di e conexion aki ta cu esnan cu ta bahando di San Nicolas pa bay traha na hotelnan, ta pasa pafo di e ciudad di Oranjestad. Ta nifica cu turistanan cu sali for di aeropuerto den forma rapido ta yega nan hotel pa por cuminsa disfruta di nan vakantie y e containernan cu ta sali for di Barcadera, ta haci uzo di Watty Vos Boulevard pa yega nan destino. “Esaki ta nifica cu e congestion cu ta experencia riba L.G. Smith Blvd, ta mengua,”Prome Minister a bisa.
Mirando grandura di e proyecto aki, no ta papia di un “ringweg”mas pero di un infrastructura total cu ta bay duna contenido na dimensionnan di desaroyo nobo pa pais Aruba. Den esaki a inclui un desraoyo importante di renobacion di areanan hopi importante pa pais Aruba, manera den e barionan di Ponton te cu Noord. E ta algo similar manera cu ta sosode na Pos Chiquito y Savaneta cu Green Corridor. Rond e area di hotel tambe lo mira henter un renobacion, kedando hopi mas bunita, accesibel, structura y placentero pa e ciudadanonan cu ta bishita e area aki.
Awo t’asina leu cu, segun Prome Minister a informa, e trabounan ta cuminsa fin di e luna aki bou guia di e compania Mota-Engil. “E ta bay ta un inversion sumamente grandi cu ta bay yuda inyecta den economia pa creacion di trabou y stimulacion di economia.”
Prome Minister Eman a sigura cu e procesa encamina tabata uno hopi independiente, guia pa un comision consistiendo di profesionalnan independiente cu a percura pa e seleccion a cana di forma independiente y yuda pa Waterrijkstaat, garantisando sostenibilidad di e proyecto pa pais Aruba. “Minister Sevinger por ta contento y orguyoso di a guia e proyecto di mas grandi cu Aruba a yega di realisa riba tereno di infrastructura. Pesey nos ta contento pa anuncia cu e financiamente y parti tecnico ta cla, y contract a wordo firma.”