Home Uncategorized GOBIERNO TA COBRA PENSIONADONAN DIMAS AZV Y BELASTING

GOBIERNO TA COBRA PENSIONADONAN DIMAS AZV Y BELASTING

SHARE
STA. CRUZ — Semanalmente lider di MEP Evelyn Wever-Croes ta ricibi personanan na Cede di MEP cu mester di un of otro ayudo. Sea di belasting, of asuntonan di onderstand of legal.
“Locual cu mi a constata yudando nos pensionadonan ta cu nan ta hayando cobransanan di AZV hopi inhusto.
Pa cuminsa e tarifa di AZV ta hopi halto pa pensionadonan. Un pensionado mester paga 10,5% di su pension na prima di AZV, siendo cu un persona cu ta traha ta paga 1,6% di prima so.
Den esaki nos mester trese cambio y rebaha e prima di pensionado pasobra 10,5% pa e pensionado paga ta demasiado halto.
Pero no ta esey so ta e problema. E problema mas grandi ta cu SVB ta retene di menos di e pensionadonan. SVB ta hasi uso di un areglo biew, y no ta tene e prima completo di 10,5%. Y esaki ta pone cu ora e pensionado haya un cobransa na fin di aΓ±a, e ta haya pa paga EXTRA na AZV. Tin biaha e AZV ta bin mas halto cu e belasting mes. Esaki no ta husto, pasobra ta e pensionado ta sali perhudica.
E problema mas grandi ta keda e cumulacion di pensioen. Ora un pensionado cu ta haya e pensioen di biehes haya un otro entada aserca, e ta hay’e cu cobransanan di mil florin bai ariba. Esaki ta pasobra ainda e gobierno aki ta cobra belasting riba pensioen di biehes. Nan ta bisa cu nan a purba cambi’e, pero puntra cual pensionado cu bo kier, y bo lo scucha cu nada a cambia, ta peor cos a bira. Pesey nos lo elimina e belasting riba pensioen di biehes.
Pensionadonan ta esnan cu mas a wordo neglisha den e ultimo 8 aΓ±anan. Nos mester percura mihor pa nos grandinan, y MEP lo percura pa alivia nan peso di belasting. E ta mi area di experticio y mi sa exactamente con pa hasi’e. Nos compromiso cu nos pensionadonan ta pa alivia nan peso di belasting, elimina belasting riba pensioen di biehes, y baha e prima di AZV pa pensionadonan”, asina Evelyn Wever-Croes a duna di conose.