Home Uncategorized Cantidad grandi di cas ta haya luz den e bario di Ponton...

Cantidad grandi di cas ta haya luz den e bario di Ponton Luznan LED ta 28 watt pero ta duna iluminacion di 80 watt

SHARE

ORANJESTAD – “Mi ta contento cu un biaha mas nos por a cumpli cu peticion di pueblo, e biaha aki cu e habitantenan di Ponton, instalando puntonan di luz nobo cu ta yega te n ae area di Tanki Leendert,” Prome Minister Mike Eman a bisa siman pasa diahuebs durante un bishita den e bario aki.

E anochi ey den forma simbolico e prome luz a wordo cendi door di un habitante, mientras cu den e dianan cu a sigui a instala mas luz. Esnan cu tabata biba den scuridad ta hopi contento cu Gobierno di Prome Minister Eman a percura pa luz.

Diferente bisiña a acudi e anochi ey pa celebra e hecho aki, cu ta trece mas asercamento entre bisiñanan, pero tambe ta yuda den siguridad y un bista mas cla pa trafico. “Awe e parti di Ponton cu tambe tabata den scuridad, por bisa cu denter di poco no ta asina mas,” e mandatario a splica. El a agrega cu e siman aki nan lo ta na Calabas cu Accion di Bario. Durante e bishita aki lo keda inaugura e batting cage cu Gobierno a percura p’e, y tambe e mashin special pa e deportistanan practica nan bateo. “E ta un batting cage sumamente profesional, esnan di Rockets di Sta. Cruz ya caba ta disfruta di un mashin similar.”

Na final di e ceremonia Prome Minister Eman a informa e habitantenan cu e lo bay papia cu su colega di Infrastructura riba e peticion cu nan a haci pa pone “verkeersplateau”, specialmente pa motibo cu tin hende grandi ta biba net riba e caminda cu e trafico ta pasa cu velocidad halto. “Nos lo no descansa te ora cu nos trece felicidad den tur cas di Aruba,” Eman a bisa. Riba esaki un di e habitantenan a reacciona bisando “masha masha danki Prome Minister, pa trece luz pa nos. E ta necesario.”

E luznan cu ta wordo instala den e barionan ta LED, pa di e forma aki sigui cu e maneho sostenibel di Gabinete Mike Eman II. E bombiyonan ta di 28 watt di LED, pero su iluminacion ta uno di 80 watt, pa cual e ta duna mas iluminacion cu esnan tradicional. E luznan aki tin un timer y ta wordo programa pa cende y paga na cierto ora. Debi cu e iluminacion ta mas hopi cu esnan tradicional, ta wordo poni cada pasa un palo di luz. ELMAR a informa cu den e caya ey di Ponton lo instala mas cu 20 punto di iluminacion nobo.