Home Uncategorized TUR HENDE TA PIDI UN CAMBIO DI GOBIERNO BAN TRESE ORDEN Y...

TUR HENDE TA PIDI UN CAMBIO DI GOBIERNO BAN TRESE ORDEN Y RESPET BEK DEN COMUNIDAD

SHARE

SAVANETA – Partido MEP den fin di siman a cuminsa su campaña intensivo den Savaneta. Ya desde oranan trempan di mainta un multitud di como 100 persona a aglomera na e Cede na Savaneta pa campaña hunto cu e candidatonan. Durante henter dia por a mira nan movecionnan den e barionan di Savaneta.

“Nos ta hopi contento cu e recepcion den Savaneta. Nos a wordo hopi bon ricibi, y bo ta sinti cu tur hende kier un cambio. Savaneta ta un bario cu a sufri hopi bou construccion di e caretera di vierbaansweg, pero e camindanan den e barionan mes ta den hopi mal condicion. Ni cuanto nan a pidi atencion pa esakinan, nan a wordo neglisha y laga na caya. Nos ta splica tur habitantenan cu awor ta suficiente den inversion di estetica, ta tempo pa un cambio pa pone e ser humano central atrobe. Seguridad, di cual lusnan den bario ta un necesidad, cuido di salud, careteranan den bario den bon condicion.

Un otro problema serio ta e problema di criminalidad den Savaneta, hortamente y bendemento di droga, cu den esey tur hende cu nos a papia cu nan ta duna nos rason cu e gobierno aki a faya. Nan ta duna MEP rason cu nos mester atende cu criminalidad cu man duro. Orden y respet nos mester trese bek den nos comunidad.

Di e forma aki nos ta sigi hasi nos bishitanan den tur bario pa nos scucha di e habitantenan mes kiko nan kier mira wordo cambia na Aruba, y kiko mester ta e prioridadnan di e sigiente gobierno. Un gobierno di pueblo y pa pueblo”, lider di MEP Evelyn Wever-Croes a duna di conose.