Home Uncategorized SIMAN GRANDI PA MEP Y PA ARUBA MEP TA CUMINSA...

SIMAN GRANDI PA MEP Y PA ARUBA MEP TA CUMINSA CAMPANJA 2017

SHARE

Sta Cruz — Manera lider di MEP a anuncia e siman aki lo cuminsa oficialmente e campaña electoral di partido MEP pa eleccion 2017.

E siman aki lo lansa e prome candidato nobo pa eleccion 2017. E siman aki lo desvela e logo y slogan nobo pa campaña. E siman aki lo tin e prome materialnan di campaña. Y e siman aki lo anuncia e vision y solucionnan di MEP. Tur esaki lo pasa durante un actividad grandi dia 17 di maart 2017 na Cede di MEP.

Un siman hopi grandi pasobra como e partido actualmente mas grandi den tur encuesta partido MEP ta sende e mecha di campaña 2017 oficialmente.

E SIMAN AKI TUR CANDIDATO NOBO TA WORDO LANSA?

Lider di MEP Evelyn Wever-Croes a duna di conose cu lansamento di candidatos ta algo hopi serio y delicado. Tin un strategia hopi especifico tras di esaki. Pesey no por lansa candidatonan tur parew. Sinembargo tur candidato nobo lo haya amplio tempo pa campaña y pa profila nan mes prome cu eleccion. E siman aki nos ta cuminsa cu lansamento di candidato y otro luna nos ta sigi.

ENCUESTANAN TA DUNA MEP GANA

Encuestanan hasi pa medionan di comunicacion ta duna MEP gana na e momento aki. MEP segun e encuestanan ta e partido mas grandi na Aruba y nos a puntra lider di MEP su opinion riba esaki.

“Nos encuestanan ta confirma esaki y naturalmente esey tin nos contento. Sinembargo nos no ta ainda caminda cu nos mester ta y tin hopi trabou pa hasi ainda. Nos ta wordo hopi bon ricibi den comunidad y mi ta hopi agradesido pa esey. Nos lo percura pa trese nos mensahe serca tur hende na Aruba pa asina convense ainda esnan cu no ta convensi cu Aruba mester di un cambio. Nos lo trese e cambio pa pone e ser humano central bek. Siguridad. Baha costo di bida. Enseñansa di calidad y cuido di salud digno. Aruba lo ta cla pa e cambio dia 22 di september 2017” lider di MEP Evelyn Wever-Croes a duna di conose.