Home Uncategorized Shonnan awor tin cos! E grandinan di baseball di Aruba ta...

Shonnan awor tin cos! E grandinan di baseball di Aruba ta subi veld den campeonato di Baseball Classic

SHARE

Ta invita tur hoben cu aspiracion di carga nomber di Aruba den baseball pa conoce baluartenan di baseball

ORANJESTAD, Aruba – 10 di maart 2017: Despues di un apertura sumamente bunita dia 4 di maart unda cu ocho team di baseball veterano a subi veld di Crismo Angela/Nadie Croes  e weganan di veterano ta sigui awe. Meta di e weganan aki ta pa introduci e grandinan di baseball di Aruba na e hobennan cu aspiracion di bira hungadornan profesional como tambe yega na e meta di organisa un bon campeonato internacional entre e paisnan di Reino na final di e aña aki.

Directiva di Baseball Classic ta invita un y tur pa acudi na veld di Crismo Angela/Nadie Croes (ex-Winston Veld) riba tur diasabra pa wak no menos cu ocho team di veterano cu un par di Aruba su grandinan di baseball aden.

“Djis pa menciona nos tin hungadornan manera Rock Angela, Franklin Danies cu ta e streanan di antes. Mas cu tur nos ta invita e hobencitonan pa bin cera conoci cu e famosonan di baseball Arubiano pa nan wak pa nan mes kico ta kico. Nunca por sa por ta tin un otro Xeander Boogarts den e wega aki na Aruba,” Joy Orman ta bisa.

“Asina ta nos ta invita tur mayor pa trece nan yiunan asina cu nan wega di little league caba pa nan por experiencia y sinti kico deporte di baseball por haci pa nan.” E ta agrega.
Despues di un desfile bunita y palabranan di bon bini di Minister di Deporte, Dr. Alex Schwengle como tambe di sr. Jerry Franca di ASU e ocho teamnan compitiendo pa e titulo maximo den baseball clasico a cuminsa nan bataya siman pasa diasabra y ta cla pa sigui e siman aki na e mesun lugar.

E aña aki e teamnan den wega ta: Marlboro Classic, Ecotech Leftovers, ATCO Richmond, Surprise Bommers, Spuiters Baseball Club, Unfogettable San Nicolas… “y e aña aki dos team nobo a uni cu ta Salopark Destroyers y Brazil Luca Dental Care. Un caluroso Bon Bini na nan,” directiva di baseball classic ta bisa.
E ta sigui bisa cu e campeonato ta dedica na seis baluarte di Aruba Franscisco “Chipen” Chirino, tremendo manager cu Aruba a yega di produci; Stanley Ashbey, catcher; Jesus “Chu” Halabi, catcher di Antiyas y Aruba, Marx Gumbs, shortstop di Arusino y Aruba Caribbean Hotel; Clyde Harms tremendo centerfielder den su epoca como tambe un enciclopedia riba historia di baseball na Aruba;  y umpire August “Popeye” Reyes… “pasobra sin managers, sin hungador, y sin umpire no por tin wega y nos ta corda riba tur nos hendenan cu di un of otro forma a yuda nos baseball di chikito te na grandi.”

Mirando cu e asociacion di baseball clasico ta un organisacion sin fin lucrativo nan ta depende completamente riba comercio y e bar di cada un di nan eventonan pa por cubri gasto. E meta di tene e campeonato aki ta primeramente pa hisa e nivel di baseball na Aruba pero tambe pa engrandese e deporte riba su mes. E fondonan cu logra saca for di e campeonato aki lo bay pa organisa e prome copa di Weganan di Reino Clasico, o sea veterano, na Aruba na fin di aña.

Den combersacionnan cu sr. Willems di Corsou por informa cu ya caba Hulanda a confirma su participacion den e campeonato aki cu lo tuma lugar na final do october comienso di november. “Esaki ta un parti chikito di e trabaonan cu nos ta haciendo pa lanta baseball bek na Aruba hibando e bek na e nivel di su temponan di Gloria,” e ta elabora.

Directiva di Baseball Clasico ta gradici Banco di Caribe, Refineria di Aruba, SETAR cu ta sosteniendo e campeonato aki… “y nos ta gradici Tropical Bottling Co. pa e tremendo deal demostrando nos cu nan ta kere den loke nos ta haci. Aña pasa nan a apoya nos pa asina nos por a yega na e fondonan necesario riba caminda pa e Weganan di Reino y e aña aki atrobe nan tey pa nos 100%.”

E meta principal di e asociacion ta pa rebiba baseball na Aruba tanto di e chikitonan te cu dobbel A. Pa e chikitonan cera conoci cu e super astronan cu Aruba a yega di produci. “Si e muchanan aki wak nos superastronan hunga baseball nan lo por mira cu nan ta ehempelnan pa sigui,” e ta enfatisa.
Campeonato a cuminsa cu dos wega tremendo riba veld di Crismo Angela/Nadie Croes cu e campeon y subcampeon, Marlboro Clasico y Ecotech Leftovers, respectivamente, batayando pa keda cu nan titulo sigui pa wega di nobatonan Salopark y Unforgettable San Nicolas.

E siman aki e otro ekiponan lo demostra cu nan tambe tey pa bay cu e titulo.
Weganan ta tur diasabra di 1’or pa 3’or y cada dos siman ta tira un mas riba programa pa 10:30 di mainta.Un y tur ta invita pa join nos na engrandese nos deporte di baseball y na mes momento pasa un bon dia cu nos. Pa e hobennan ken por sa, por ta abo ta e proximo strea grandi di baseball cu Aruba ta produci,” Joy Orman ta conclui.