Home Uncategorized Prome Minister Mike Eman: Plasa Padu lo tey pa semper nos por...

Prome Minister Mike Eman: Plasa Padu lo tey pa semper nos por honra e creacion y creadornan di nos Himno Nacional

SHARE

ORANJESTAD – E siman aki Gabinete Mike Eman II a anuncia cu diabierna 17 di Maart proximo tin inauguracion oficial di Plasa Padu. Sin duda, esaki ta bay ta un momento special, unico y inolvidabel. Prome Minister Eman a comenta cu Padu a sa di trece hunto den e composicion di nos himno nacional, e expresion di nos sentimentonan mas patriotico.

E plasa su enfoke principal ta e estatua tamaño real di Padu Lampe tocando piano cu Rufo Odor y Lio Booi sinta banda di dje. Crea pa artista local Ciro Abath, e imagen aki ta representa con nan tres a compone nos himno nacional ‘Aruba Dushi Tera.’ Minister President Mike Eman a indica durante e conferencia di prensa cu “un bes cu e keda inaugura, pa semper nos tur lo keda cu e oportunidad pa comparti e momentonan inspirativo di e composicion di nos himno.”

Manera ta conoci, originalmente ta Padu Lampe y Rufo Wever a compone e prome version di nos himno, y cu pa algun decada a keda asina. Despues a pidi Lio Booi pa pone un couplet acerca y esey ta e version cu a keda oficialisa y nos conoce te awe. “Na tur tres nos ta duna merito y honor,” asina Prome Minister a bisa, expresando tambe cu nos ta dichoso di por tin Padu Lampe cu nos ainda pa biba e momento aki.

Mescos Lampe a biba un momento sumamente grandi den nos historia y esey ta e formalisacion di e pensamento di un Aruba autonomo. Padu Lampe tambe ta un di e firmantenan cu ta registra riba monumento 18 di Maart. Premier Eman: “Juan Chabaya Lampe su nomber tambe ta registra; esey kier men cu e personahe aki tabatey for di prome momento cu e curason di Arubianonan tabata palpita pa autonomia. Algo cu el a articula tambe den hopi cancion di e tempo ey y cu ta conoci tambe.”
Plasa Padu ta bay ta otro plasa cu Aruba ta bay tin y na unda durante aña tambe por bini hunto na momentonan historico, momentonan di expresion cultural, momentonan di expresion di stimacion pa nos baranca. “Un plasa sumamente bunita cu ta finalisa tambe un vision cu nos gobernacion a inicia. Naturalmente nos no ta cla ainda, tin hopi edificio pa restaura, pero sumamente contento cu e aporte,” Premier Eman a bisa.

E apertura ta inicia pa 6’or di atardi cu un marcha di Plasa Niki Habibe, sigui pa e parti protocolario di apertura riba Plasa Padu, y ta culmina mas den anochi cu un concierto publico riba Plasa Daniel Leo.