Home Uncategorized Minister Richard Arends ta haci apertura oficial di e filial na San...

Minister Richard Arends ta haci apertura oficial di e filial na San Nicolas di Western Union y Topstart

SHARE

“Gobierno ta sostene y aplaudi e iniciativa di e dos empresarionan local aki”

SAN NICOLAS- Diahuebs anochi e conocido empresarionan Ronny van Trigt y su partner di negoshi Wilfred Ras tabatin apertura oficial di e ultimo filial na Aruba di Western Union den e bario di San Nicolas, no leu di e porta grandi di Citgo. Na mes momento tambe a habri nan ‘uitzendbureau’ Topstart den e mesun edificio. Minister di Asuntonan Economico Richard Arends tabatin e honor pa haci e apertura oficial hunto cu un manager regional Caribense di Western Union y un dama, empleado local di e compania. A sigui un recepcion ameno.

Minister Arends a cuminsa na bisa di tin masha hopi palabra di elogio pa sr. van Trigt y sr. Ras, comerciante y inversionistanan cu tin hopi negoshi grandi aki na Aruba y cu ta kere den economia di Aruba. “Mi ta orguyoso di e empresarionan local aki cu pa mas di 25 aña ta den actividadnan comercial na Aruba y cu a probecha di reapertura di e refineria y haciendo uzo di e actividadnan fiscal cu tin.” Arends a pone enfasis riba e hecho cu ora ta papia di efectonan secundario di e refineria, e negoshinan aki ta ehempel bibo di esey. “Esaki ta specificamente loke mi ta referi na dje. E negoshinan aki ta crea empleo y ta brinda servicio na nos sociedad. No ta solamente Western Union, pero tambe e uitzendbureau Topstart, cu ta wak e oportunidad di mercado. Negoshinan asina di empresarionan local ta loke nos como gobierno ta sostene y aplaudi. Nos ta orguyoso di nan iniciativa y ta desea nan tur clase di exito.”

Tambe Minister Arends a accentua cu ambos compania por haci uzo di e Zona Special pa San Nicolas ya cu nan ta cay den e categoria di negoshi cu ta bin na remarca pa e trato fiscal special aki. “Nos tin cinco zona fisico di desaroyo cu gobierno a presenta. Un di esnan mas grandi ta e zona rond di e refineria. E zona special di San Nicolas cu por facilita e negoshinan aki nan. Ya for di 2013 nos a introduci  e zona special aki pa companianan cu ta cumpli cu cierto rekesito manera e cantidad di empleado local, e cantidad di inversion y e cantidad di ganashi cu ta bin na remarke pa un regimen fiscal hopi mas faborabel den e zona di San Nicolas.”

Arends a splica cu esaki ta un ehempel con gobierno por maneha su economia, stipulando un area special  y gobierno ta acople na incentivonan fiscal cu den e caso aki a duna como resultado cu dos empresario local cu hopi vision ta establece nan mes na San Nicolas probechando di e actividadnan economico nobo. Arends un bes a felicita van Trigt y Ras cu e paso tuma.