Home Uncategorized Elton Lioe-A-Tjam (ABO): E acusacionnan di MinJus si ta regla den...

Elton Lioe-A-Tjam (ABO): E acusacionnan di MinJus si ta regla den e Codigo Penal, pero despues di 4 siman, nada!

SHARE

Diabierna pasa e presidente di Korea Sur, Sra. Park Geun-Hye, a wordo baha  oficialmente for di su puesto, despues cu e corte constitucional a ratifica e decision parlamentario y splicando cu tin suficiente prueba cu ta mustra cu e presidente a maluza su posicion pa enrikece su mes. Na Brazil algo similar a pasa cu e presidente, Sra. Dilma Rousseff, den e operacion di ‘Lava Jato’. Durante e operacion aki e actual presidente, Sr. Michel Temer, y e ex-presidente, Sr. Luiz Lula da Silva, tambe ta wordo investiga pa e mesun delito di corupcion y enrikecimento personal. Pero e investigacionnan di corupcion no a caba cu operacion ‘Lava Jato’. Actualmente Ministerio Publico di Brazil ta investigando e compania ‘Odebrecht’, unda a wordo comproba cu no solamente na Brazil, pero tambe na Angola, El Salvador, Panama, Republica Dominicana, Venezuela y Colombia casi 4 biyon dollar a wordo paga na politiconan, pa asina yuda nan gana eleccionnan.

Algun aña pasa, parce cu no tabata pasa un luna, cu un di nos gobernantenan no tabata na Brazil. Pero diripiente tur esaki a cambia. Diripiente Brazil tabata ‘out’ y Sr. Roberto Rincon tabata ‘in’. Si esaki tabata puro casualidad, solamente cu tempo, investigacionnan profundo y kisas remordimento di consenshi, pueblo lo haya sa. E ‘switch’ tabata uno solamente geografico. Pasobra e parameters den ambos caso a keda mescos: politiconan cu diripiente a bira miyonario, e negoshi di petroleo y proyectonan di infrastructura miyonario. Den tur dos ehempel di Korea sur y Brazil, nos ta mira cu fiscalnan balente a cuminsa investiga y persigui gobernantenan y politiconan cu a maluza di nan posicion, sin miedo. Fiscalnan balente a cuminsa duna oido na loke e pueblonan tabata sclama pe.

Na Aruba, tambe pa añanan largo un parti grandi di pueblo ta sclamando pa caba cu corupcion den gobernacion. Ministerio Publico (y Hulanda) no por sigui sconde tras di excuusnan fofo manera parlamento no a duna Ministerio Publico e instrumentonan necesario pa actua. Desde 2008, Ministerio Publico (y Hulanda) sa exactamente kico ta pasando aki na Aruba den gobernacion. Den su carta na parlamento, Ministerio Publico ta bisa cu ‘..zonder aanwijzingen van een commuun delict wordt een BEWEERD ambtsmisdrijf in beginsel niet in onderzoek genomen’, a pesar cu e ta comparti e opinion di Controlaria General (Algemene Rekenkamer): ‘dat het niet verschaffen van een (behoorlijke) motivering als zodanig een OVERTREDING van de Comptabiliteitswet kan zijn, STRAFBAAR GESTELD in art. 372a en 372b van het Wetboek van Strafrecht, en het verschaffen van een onjuiste motivering VALSHEID IN GESCHRIFT kan opleveren’. Y cu ‘Elk geval van afzien van een openbare aanbesteding draagt in zich de mogelijkheid van ONGEWENSTE BIJVERSCHIJNSELEN (brief OM, 17 april 2008, kenmerk 577/2008)’.

Ainda mester ta fresco den memoria di Ministerio Publico cu varios politiconan Hulandes den pasado a yama diferente gobernante local pa corupto, ladron of narcotraficante. Banda di esaki, e maneho actual di e gobierno Hulandes ta pa no laga e ‘onder wereld’ infiltra den e ‘boven wereld’ (Vaststelling begroting Koninkrijksrelatie (IV), 15 september 2015). Tampoco ta un secreto publico cu diferente politiconan tradicional tin un amistad hopi intimo cu cierto comerciante, cu ta contribui barbaramente na nan campaña politico. Hasta un miembro prominente di parlamento, a wordo investiga den e ‘WODC-rapport’ pa su fortuna miyonario cu e la acumula den un tempo corto.

Articulo 10 di e ‘Landsverordening Instelling Ministeries 2014 di 23 december 2013’, ta bisa cu e minister mester tuma decisionnan drechi y transparente. Anto dicon parlamento desde 2008 no por a duna e carta di Ministerio Publico, cual e mes a pidi pe, prioridad? Dicon ningun miembro di parlamento no por bringa mes feroz pa duna Ministerio Publico instrumentonan pa combati corupcion den gobernacion, manera un miembro a haci den su caso personal di ‘Geregistreerd Partnerschap’?

Pa esunnan cu a lubida of cu intencionalmente kier lubida, na september 2015 e mesun minister di Husticia a declara publicamente: ‘Ami no por haya un ‘KB’ (Koninklijk Besluit), paso mi maneho no ta duna espacio pa un KB’. Pues indicando cu un otro ‘KB’ tabata na caminda. Cada biaha pueblo ta tende di tur sorto di ‘KB’ of cu e famoso ‘busje’ ta na caminda. Pero semper nada ta pasa. Pueblo kier mira accion awor y cu corupcion den gobernacion wordo investiga y combati seriamente, manera ta pasa na tur parti di mundo y den Reino. Corda cu e siman aki, lo ta e di 4 siman desde cu e minister di Husticia a acusa su ex-colega di Turismo di tur tipo di ‘strafbare feiten’, y ainda ningun tipo di investigacion a cuminsa. Hopi straño, manera tur e ‘strafbare feiten’ aki, si ta regla den e Codigo Penal!