Home Uncategorized Tur cos ta cla pa inauguracion di Plasa Padu, Den fin di...

Tur cos ta cla pa inauguracion di Plasa Padu, Den fin di siman ta transporta e estatua pa Plasa Padu

SHARE

ORANJESTAD – Gabinete Mike Eman II a percura cu nos Tata di Cultura Padu Lampe ta haya e debido reconocemento na bida, construyendo un Plasa  na su nomber, unda cu tin un estatua dje na piano hunto cu Rufo Wever y Lio Booi, kendenan a contribui na composicion di himno di Aruba.

E nomber Juan Chabaya ‘Padu’ Lampe (Padu) siendo un hoben, a expresa su mes politicamente firmando e peticion pa Aruba ta Baas den su propio Cas. E tempo ey no a pensa niun momento cu Padu Lampe lo forma un parti importante di historia di Aruba. No solamente como firmante di e peticion, pero un composicion original di Padu como musico a wordo adapta hunto cu Rufo Wever, cu un couplet agrega door di Lio Booi, a bira e himno di Pais Aruba. Padu a logra biba tur e momentonan importante aki di pais Aruba.

Gobernacion di Gabinete Mike Eman II a tuma e decision pa dedica e plasa nobo patras di e Centro di Gobernacion y den e Centro Historico di Aruba na e gran yiu di tera Padu lampe. A pone e trabou di diseño di e estatua di Padu y e co-autornan di Himno di Aruba den man di e conocido artista Arubiano Ciro Abath.

E plasa ta cla y e estatua ta cla. E fin di siman aki Prome Minister Eman lo ta presente na momento cu transporta e estatua directamente for di Turibana, na Noord, pa Plasa Padu. E evento aki ta bay wordo transmiti en vivo via Facebook. Esaki ta un momento special den historia di Aruba y por logra hacie na momento cu Tata di nos Cultura, Padu Lampe, ta mey-mey di nos pa experencia esaki.

Pabien Aruba y prepara pa e gran inauguracion di Plasa Padu cu lo tuma luga riba diabierna, 17 di maart. E apertura ta inicia pa 6’or di atardi cu un marcha cultural di Plasa Niki Habibe, sigui pa e parti protocolario di apertura riba Plasa Padu, y ta culmina mas den anochi cu un concierto publico riba Plasa Daniel Leo.