Home Uncategorized Prome Minister Mike Eman: Nos ta bay honra tur y cada un...

Prome Minister Mike Eman: Nos ta bay honra tur y cada un di e 2.147 firmante cu a carga e lucha pa nos Status Aparte

SHARE

ORANJESTAD – Como parti di e celebracionnan pa Dia Nacional di Himno y Bandera, tin un ceremonia solemne programa riba Monumento 18 di Maart. E actividad aki ta un parti regular di e fiesta patriotico, sin embargo e aña aki, lo conoce un fecha diferente y un toke unico. Durante conferencia di prensa cu Comision Celebracion Dianan Nacional, entre otro instancia envolvi, Minister President y alabes Minister di Cultura Mike Eman a anuncia cu e acto ta diseña pa duna e maximo dedicacion y reconocemento na un di e personanan homenahea.
“E 2.147 firmante ta e pioneronan di e lucha pa un dia ta baas den nos mesun cas y a cana cu e deseo pa Aruba por a realisa su status aparte,” Minister President Eman a bisa. Cu nan trabou, pa prome bes den Reino Hulandes, a acepta e deseo aki den un mocion di dia 18 di maart 1948 aproba cu unanimidad den Conferencia di Mesa Rondo. Premier Eman a splica cu tabata danki na e sosten total den nos comunidad cu 2147 persona, e tempo ey den un comunidad hopi chikito, cu tabatin e derecho di voto y tabata representa 70% di e electorado.
“Pa mi ta un honor pasobra tabata mi Tata cu a hiba e 2.147 firma cu a wordo pone den un forma hopi formal,” e mandatario a expresa contando con na 1947 a cuminsa yama reunion na diferente cas y diferente club rond di nos isla. Na cada ocasion a presenta e texto manifestando e deseo pa Aruba haya su Status Aparte. “Y esnan cu tabata firma, tabata hacie dilanti di un notario, como un persona cu tin e derecho di voto, segun e leynan di e tempo ey,” Premier a conta.

Tambe a splica cu a scoge e fecha di 16 di maart pa motibo cu hopi biaha e ceremonia ta forma parti di un programa hopi strak cu no ta duna berdaderamente espacio pa demostra e honor, dignidad y serenidad necesario na esnan cu a carga e lucha den su prome ora. “Nos tin mester di tempo pa dedica na e 2.147 firmante aki, algun di nan cu nos ainda y nos lo haci e esfuerso pa nan ta personalmente presente.

Un invitacion awe caba na tur famia, yiunan, nieto, bisanieto sobrino y rumannan pa haci acto di presencia dia 16 dfi maart pa nos duna honor y respet,” Minister President Eman a finalisa bisando.