Home Uncategorized PARTIDO MEP A CELEBRA DIA INTERNACIONAL DI HENDE MUHER DEN GRAN FORMA

PARTIDO MEP A CELEBRA DIA INTERNACIONAL DI HENDE MUHER DEN GRAN FORMA

SHARE

Dia 8 di maart, dia internacional di hende muher, partido MEP a celebra na grandi den Indian Rock Garden. E evento, organisa pa Forsa Femenino Grace, tabata SOLD OUT di trempan.
Durante e anochi sumamente ameno por a scucha discursonan hopi inspirativo y poesia, tabata tin reconosemento na esnan cu a aporta na partido MEP y Forsa Femenino Grace durante 46 aña di existencia di partido, y na final tabata tin un entretenimento hopi anima door di sr. Etty Toppenberg.

Sra. Ella Tromp-Yarzagaray tabata orador invita, y a comparti cu tur esnan presente e desaroyo di derecho di hende muher durante tempo. Tambe el’a para keto na e logronan di hende muher durante historia. Por a nota cu tur hende a keda masha contento cu e discurso di sra. Ella Tromp-Yarzagaray, pasobra ta nos mesun hendenan. Hopi biaha, ora bo busca hende di exterior pa papia, e por ta interesante, pero nos mesun hendenan ta hasie mucho mas mihor. Na final di su discurso sra. Ella Tromp-Yarzagaray a ricibi un homenage pa su añanan di dedicacion na partido MEP, y na Forsa Femenino Grace.

Ademas, di e discurso di sra. Ella Tromp-Yarzagaray, sra. Yuyu Croes presidente di Forsa Femenino Grace, a gradisi tur presente especialmente pa hasi e anochi un exito un biaha mas. Sra. Clarette Quandus a declama un bunita poesia, dedica na e hende muher. Sra. Xiomara Ruiz-Maduro a hiba un discurso riba e tema “No permiti miedo strobabo di hasi lo corecto”, den cual el’a relata tambe riba experiencianan personal. Finalmente sra. Evelyn Wever-Croes a hiba un discurso riba e tema internacional pa e fecha aki “Be bold for change”, “Ban pa e cambio. Sin miedo!”. E tema internacional ta casualmente e mesun lema cu partido MEP ta hibando den comunidad. Ban pa e cambio, sin miedo, y den esaki sra. Evelyn Wever-Croes a relata kiko ta e cambionan cu den su vision nos mester na Aruba, pa nos hasi Aruba manera e tabata, pa nos hasi nos hendenan orguyoso atrobe di nos dushi Aruba.,

Un parti di e anochi a wordo dedica pa rindi homenage na damas cu durante añanan a contribui na Forsa Femenino Grace y na partido MEP. Por a nota cu esnan cu a ricibi e homenage a keda sumamente contento y agradesi.

E anochi a wordo clausura pa un tremendo animacion di sr. Etty Toppenberg, cu a pone tur hende riba pia pa canta y baila. Un anochi bunita cu lo ta dificil pa lubida. Pabien Forsa Femenino Grace y pabien partido MEP.