Bureau Multidisciplinair Centrum (MDC) ta e curason di e structura di cuido di nos enseñansa na Aruba. E meta di nan trabou ta pa yuda muchanan/alumnonan cu tin un stagnacion den nan desaroyo na scol pa motibo di problema specifico di siñamento y/of di comportacion. MDC ta duna sosten psicologico y guia na maestronan y otro personal di scol.
MDC ta consisti di Expertisecentrum, Observatiecentrum y Teacher Care. Na Expertisecentrum ta traha 15 persona, un team multi disciplinario di psicologo, logopedista y ambulante begeleiders didactiek. Nan ta haci e.o. testnan, nan ta diagnostica, duna guia ambulante na e mucha, e famia y/of scol, sosten na e structura di cuido interno di scolnan etc.
E Observatiecentrum ta consisti di 1 kleuterklas, 1 eerste y 1 tweede klas. Den cada klas tin maximo 8 alumno. Ta trata di muchanan cu no por funciona den enseñansa regular pa motibo cu nan tin problema grave di comportacion y/of problema psikiatrico. Mainta nan ta haya enseñansa (setting di scol) y despues di scol nan ta haya cuido y guia te atardi dor di profesionalnan cu ta ofrece nan un programa special (setting di opvang). E centro aki tin un team di 19 trahado; e maestronan y nan assistentnan, un Interne Begeleider, un trahado social, un terapista di musica y un di movecion, un psycholoog, un logopedista part-time y lidernan y assistent lidernan pa e opvang despues di merdia. Teacher Care tin un psicologo cu ta ofrece yudansa individual na maestronan y esunnan cu ta sostene scolnan manera IB’er, remedial teacher, trahado social. E ta un forma pa esunnan trahando den enseñansa por conta cu mas sosten, ayudo y apoyo, pa asina enfrenta diferente retonan emocional cu por presenta den nan trabou diario na scol of den nan bida personal.
Durante e siman di 6 di maart 2017 e personal di e Expertisecentrum, e psicologo Teacher Care y algun trahado di e Observatiecentrum lo sigui e prome parti di e training “Handelingsgerichte diagnostiek en begeleiding/behandeling van leer- en gedragsproblemen” di e organisacion Hulandes GITP.
E ultimo parti lo tuma luga den mei.
A cuminsa dia 3 di februari ultimo cu un kick off caminda e trahadornan a haya un presentacion di e programa y cada grupo a formula nan “leerdoelen.” Despues di esaki a habri online un site (“leeromgeving”) caminda e participantenan ta ricibi tur informacion y caminda nan mester traha nan toetsnan.
Drs. Beatrijs Brand, orthopedagoog/GZ-psycholoog, ta guia e training y lo enfoca riba maneranan pa relata conocemento teoretico na e practica di tur dia. Topiconan cu lo bin dilanti ta e.o. intake di kehonan y analisis di kehonan, señala problema riba tereno di lesamento, señala problema riba tereno di comportacion den contexto di enseñansa, fase di investigacion y e practica di diagnostiek, e fase di diagnostica pa conseha. E training “Handelingsgerichte diagnostiek en begeleiding/behandeling van leer- en gedragsproblemen” ta un training acredita pa Nederlandse Vereniging van Pedagogen en Onderwijskundigen (NVO), Nederlands Instituut van Psychologen sector Kind en Jeugd (NIP-K&J) y Nederlandse Vereniging voor Logopedie en Foniatrie (NVLF).
Ministerio di Enseñansa ta desea e profesionalnan di MDC hopi exito cu e training.
