Home Uncategorized EVELYN WEVER-CROES: ARUBA KIER UN MINISTER DI HUSTICIA CU TA TRESE ORDEN...

EVELYN WEVER-CROES: ARUBA KIER UN MINISTER DI HUSTICIA CU TA TRESE ORDEN Y RESPET BEK

SHARE

STA. CRUZ – Den conferencia di prensa di MEP lider di MEP Evelyn Wever-Croes a reacciona brevemente riba e hecho insolito cu mientras e ta hasi su trabou di controla y cuestiona gobierno, un preso a sali ataca su persona hasiendo su trabou.

“Esaki a pasa 10 dia pasa caminda un preso desde KIA atraves di Telearuba a sali ataca ami y mi coleganan ora nos ta hasi nos trabou. Manera mi a bisa caba, ami no ta reacciona riba e preso. Pero e tema a haya un buelta interesante ora e minister di husticia Dowers, en bes di bin parlamento manera cu nos a yame, ta manda comunicadonan masha infantil den prensa, bisando cu ta MEP mes a provoca e preso”, segun lider di MEP.

Esaki no ta corecto tampoco, pasobra MEP a hasi preguntanan por escrito na gobierno cu NO a wordo contesta, y MEP a pidi e minister bin duna cuenta den Parlamento, cual tampoco a socede. Pero pa e minister sali e defende un criminal, ta mustra cu e minister aki no ta para na banda di pueblo. Y ta pesey e bagamunderianan y ilegalidadnan ta socediendo na Aruba.

E caso a haya otro vuelta mas ora un otro cuidadano Danies siman pasa a basha abou riba e preso, pero no solamente e preso, sino den esey a involcura henter e top di partido AVP. Segun su declaracion Mike Eman, Arthur Dowers, Otmar Oduber y Benny Sievinger ta involcura den negosacion pa e entrega di un preso peligroso envolvi den asesinato; tambe a papia di pago di placa bou mesa.

En todo caso loke si a keda hopi cla ta e papel sumamente dudoso di e minister di husticia den sconde y tapa pa un criminal. Tambe e papel sumamente dudoso di Mike Eman pa acepta esaki den su propio seno y den su cas di partido. Tambe e papel dudoso di parlamentarionan di AVP.

“Ami no sa si tur locual sr Danies a trese padilanti ta berdad, mi no tabata conose tur e detayes ey, y e storia a laga ami den shock, mescos cu mayoria otro hende, pero un cos si mi ta bisa: si 10% di locual ela bisa SO ta berdad mes, anto aki na Aruba nos tin un problema hopi serio y partido AVP ta hinca den hopi bagamunderia y ilegalidad.

Pa nos e caso ta yega te akinan. Awe mi tin un cita cu Procurador General y mi lo pone tur esaki den su man. Pa manda un señal cla cu locual a pasa no ta normal. Ora e homber chikitop comete cualquier infraccion mesora ta baha riba dje cu tur peso di ley, pero awor cu e top di partido AVP ta involcura den e bagamunderianan aki, no ta tuma accion? Ta wordo hasta papia di asesinato! Si ni asina husticia no actua, nos pais berdad na man di gabinete Mike Eman ta den decadencia total.

Mientras tanto nos lo sigi exigi di e minister cu e ta bin duna cuenta den Parlamento, y nos ta sigi cu nos trabou di conbensze esnan cu nos falta di conbense pa sostene nos pa e cambio. Pa hunto nos trese bek orden y respet.  Aruba no kier un minister di husticia cu ta fiesta cu criminalnan, ni cu tin miedo di criminalnan. Aruba kier un minister di husticia cu ta actua cu man duro contra criminalidad y lo trese e biento fresco di siguridad riba nos pais” lider di MEP Evelyn Wever-Croes a duna di conose.